Bahodir Jalolov Sankt-Peterburgda 16-g‘alabasini qo‘lga kiritdi

Superog‘ir vazn toifasidagi yurtdoshimiz muxlislarni quvontirdi: Bahodir Jalolov Rossiyadagi ilk professional jangini zafar bilan yakunladi. Sankt-Peterburgda o‘tayotgan “IBA Pro 10” turnirining markaziy bahsida u mezbon bokschi Vitaliy Kuduxov (7–3, 3 KO)ga qarshi ringga chiqib, 8 raund davom etgan shiddatli to‘qnashuvda hakamlar qaroriga ko‘ra ochkolarda ustun keldi.

Jang davomida Jalolov an’anaviy ravishda masofani nazorat qildi, djeb va to‘g‘ri zarbalar bilan raqibning hujumlarini so‘ndirib, o‘z ustunligini bosqichma-bosqich mustahkamladi. Kuduxovning faol qarshi harakatlariga qaramay, hal qiluvchi paytlarda tashabbus Bahodirda bo‘ldi va u asosiy epizodlarda aniqlik hamda sabr-bardosh namoyon etdi.

Shu tariqa, 31 yoshli charmqo‘lqop ustasi professional faoliyatidagi 16-jangida 16-g‘alabasini qo‘lga kiritdi (ularning 14 tasi — muddatidan avval). Eslatib o‘tamiz, Jalolov so‘nggi marta aprel oyida Qozog‘istonda ukrainalik Igor Shevadzutskiyni ham hakamlar qaroriga ko‘ra yenggan edi.

Rossiyadagi debyutni ishonchli g‘alaba bilan boshlagan Olimpiya chempioni endi navbatdagi qadamlarini tashlashini e’lon qilishi kutilyapti. Mutasaddilar va muxlislar uning reyting pog‘onalarida yana yuqoriga suzishini, katta titullar yo‘lidagi navbatdagi sinovlarga tayyor turishini kutishmoqda.