Kataloniya klubi hujumchi Markus Reshfordning so‘nggi o‘yinlardagi samaradorligi va moslashuvidan mamnun bo‘lib, uning ijarasini to‘liq transferga aylantirishi mumkin. Bu haqida The Sun nashri xabar berdi.
Ma’lumotlarga ko‘ra, “Barselona” yozgi transferlar vaqtida Reshfordni “Manchester Yunayted”dan bir mavsumga ijara asosida olib kelgan edi. Dastlab katalonlar uni sotib olish masalasida ikkilanib turgan bo‘lsa-da, hozirda bu qarorni moliyaviy va sport nuqtayi nazaridan maqbul deb baholamoqda.
Manbalarning ta’kidlashicha, to‘liq transfer qiymati 25 million funt sterlingni tashkil etadi, yana 5 million funt qo‘shimcha bonus sifatida to‘lanishi mumkin. Bu “Barselona” uchun nisbatan qulay shartlardan biri hisoblanadi.
25 yoshli ingliz futbolchi jamoa safida jami 10 ta o‘yinda maydonga tushib, 3 ta gol urdi va 5 ta golli uzatma berdi. Uning Transfermarkt portalidagi bozor qiymati hozirda 40 million yevroga baholanmoqda.
Kataloniya klubi rahbariyati Reshfordni uzoq muddatli rejalarida muhim bo‘g‘in sifatida ko‘rmoqda. Jamoa sport direktori uni “zamonaviy hujum chizig‘iga mos va universal o‘yinchi” deb ta’riflagan.
Shu tariqa, “Barselona” uchun Reshford transferi nafaqat sport jihatidan, balki kelgusi mavsumlar strategiyasida ham muhim ahamiyat kasb etadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
