Osiyo futbolida muhim hafta boshlandi — OFK Elit Chempionlar Ligasining 4-tur bahslari start olmoqda. G‘arb mintaqasidagi bellashuvlar orasida muxlislar e’tiborini Qarshi shahrida bo‘lib o‘tadigan “Nasaf” – “Al Vahda” uchrashuvi tortmoqda. Bu o‘yin jamoalar uchun turnirdagi taqdiriy ahamiyatga ega.
“Markaziy” stadionda bo‘lib o‘tadigan bahs soat 18:45 da start oladi. Ushbu bellashuvni muxlislar jonli ravishda SportTV orqali kuzatishlari mumkin.
“Nasaf” bugun o‘z uyida muxlislar qo‘llovi ostida faqat g‘alaba uchun maydonga tushadi. Ro‘ziqul Berdiyev shogirdlari uchun bu o‘yin juda muhim — chunki jamoa avvalgi uch bahsda omadsiz natijalar qayd etib, hozircha ochkosiz holda guruh jadvalida so‘nggi o‘rinni egallab turibdi.
Shuningdek, “Al Vahda” jamoasi ham bu turda yutuq izlab kelgan. BAA vakillari avvalgi 3 turda 7 ochko to‘plab, G‘arb mintaqasidagi 12 jamoa orasida 4-pog‘onada bormoqda. Ular joriy mavsumda juda barqaror o‘yin namoyon etishmoqda — ham himoyada, ham hujumda jamoaviy harakatlari bilan ajralib turadi.
Bugungi bahs oldidan har ikki jamoa tarkiblari ham ma’lum bo‘ldi.
“Nasaf” tarkibi:
Abduvohid Ne’matov, Alibek Davronov, G‘olib G‘aybullayev, Adenis Shala, Zafarmurod Abdurahmatov, Dragan Cheran, Sharof Muhiddinov, Husayn Norchayev, Stefan Cholovich, Sardor Bahromov, Sherzod Nasrullayev.
“Al Vahda” tarkibi:
Muhammad, Amaral, Diarra, Jadsom, Kruspki, Ogbu, Pimenta, Zuhir, Gorbani, Tadich, Folya.
Qarshiliklar uchun bu bahs nafaqat ochko, balki obro‘ masalasi ham. Guruhdagi holatni o‘nglash uchun “Nasaf”ga bugungi bahsda faqat g‘alaba yordam berishi mumkin. Murabbiy Ro‘ziqul Berdiyev va uning shogirdlari keyingi bosqichga chiqish imkoniyatini saqlab qolish uchun barcha kuchni maydonda sarf etishlari kerak.
Bosh murabbiyning aytishicha, jamoa tarkibidagi futbolchilar o‘yin oldidan yaxshi kayfiyatda va g‘alaba uchun jangovar holatda. “Muxlislarimizga munosib o‘yin ko‘rsatishni istaymiz. Biz uchun har bir o‘yin — final. “Al Vahda” kuchli raqib, ammo biz ham osonlikcha taslim bo‘lmaymiz”, — degan Berdiyev o‘yin oldidan bergan intervyusida.
“Al Vahda” tomonidan esa jamoa yetakchisi Miroslav Tadich asosiy xavf manbai bo‘lishi kutilmoqda. Uning tajribasi va maydondagi xatarli zarbalari “Nasaf” himoyasi uchun sinov bo‘ladi. Shuningdek, BAA klubi safida jarohatdan sog‘aygan Diarra ham tarkibga qaytgani qayd etilmoqda.
“Nasaf” muxlislari bugun jamoadan faqat g‘alaba kutmoqda. Bu o‘yin “ajdarlar” uchun vaziyatni o‘z foydasiga burish va Elit OCHLda ilk ochkolarni qo‘lga kiritish imkoni. Agar jamoa muxlislar qo‘llovi bilan yaxshi natija qayd etsa, bu keyingi turlar uchun katta ruhiy kuch berishi shubhasiz.
Qarshida kechadigan bu bahs nafaqat jadvaldagi o‘rinlar uchun, balki nom va sharaf uchun jang bo‘ladi. Bugun “Nasaf” uchun barcha narsa bir o‘yinga bog‘liq — g‘alaba yoki xushlashuv.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
