Qatarda o‘tayotgan U-17 jahon chempionatining 2-turida Islom Ismoilov boshchiligidagi O‘zbekiston o‘smirlar terma jamoasi Irlandiya yoshlariga qarshi bahs olib bordi. Birinchi turda Paragvay ustidan ishonchli g‘alaba qozongan jamoamiz bu safar ham yaxshi boshladi, ammo hisobni saqlab qololmadi.
O‘yinning 20-daqiqasida jamoamiz safidagi Abbosbek Shukrullayev chiroyli zarba orqali hisobni ochdi va o‘z jamoasini oldinga olib chiqdi. Ammo irlandiyaliklar tezda o‘zini qo‘lga oldi. 33-daqiqada Gredi Makdonell jarima maydoni ichidan aniq zarba bilan hisobni tenglashtirdi.
Ikkinchi bo‘limda kurash yanada shiddatli tus oldi. O‘zbekiston o‘smirlari bir necha bor xavfli hujumlar uyushtirdi, ammo gol urishning iloji bo‘lmadi. 75-daqiqada esa Mikayel Nunan jarima maydoni yaqinidan aniq zarba bilan jamoasiga g‘alaba keltirdi.
Bellashuv shunday natija bilan yakunlandi — Irlandiya 2:1 hisobida g‘alaba qozondi.
Irlandiya — O‘zbekiston 2:1
Gollar: Abbosbek Shukrullayev (19) — Gredi Makdonell (32), Mikayel Nunan (75).
O‘zbekiston tarkibi: Rustamjonov, Hakimov, Bahodirxonov, Hasanov (74. Saidov), Habibullayev (74. Rustamov), Sodiqov, Anvarov, Musaxonov, Abdumo‘minov (61. Aliyev), Shukrullayev, Erimbetov (84. Muradov).
Irlandiya tarkibi: Nunan, Batler, Finneran, Kovaleskis (46. Ojianvuna), Leonard, Martos, Makdonag, Makdonell (54. Braun), Nunan M., Solanke, Ume.
Bu g‘alabadan so‘ng Irlandiya 100 foizli natija bilan guruhda peshqadamlikni saqlab qoldi. O‘zbekiston va Paragvay terma jamoalari esa 3 tadan ochko bilan keyingi pog‘onalarni egallab turibdi.
O‘zbekiston o‘smirlar terma jamoasi uchun bu mag‘lubiyat og‘ir bo‘ldi, ammo imkoniyatlar hali tugagani yo‘q. Guruh bosqichining hal qiluvchi, so‘nggi bahsi 11 noyabr kuni Panamaga qarshi bo‘lib o‘tadi. Bu uchrashuv jamoamiz taqdirini belgilaydigan hal qiluvchi sinov bo‘ladi.
Yosh futbolchilarimiz g‘alabaga intilgani va so‘nggi daqiqalargacha kurashni to‘xtatmagani esa muxlislar uchun alohida iftixor bag‘ishladi.
“Zamin”ni Telegramʻda oʻqing!
