Ispaniya chempionatining 12-turida Madridning "Real" jamoasi safarda "Rayo Valyekano" bilan oʻyinda nursiz durang qayd etdi. Xabi Alonso boshchiligidagi "Real" "Kampo de Valyekas" stadionida ketma-ket beshinchi gʻalabani qoʻlga kiritish niyatida edi, ammo mezbon jamoa bunga yoʻl qoʻymadi.
Oʻtgan haftada ikkala jamoa ham Yevrokuboklarda oʻynagan: "Real" Chempionlar Ligasi doirasida "Liverpul"ga magʻlub boʻlgan boʻlsa, "Rayo Valyekano" Konferensiyalar Ligasi doirasida Polshaning "Lex" jamoasini bir toʻp farqi bilan magʻlub etdi. "Rayo Valyekano" koʻplab kuchli jamoalar uchun murakkab raqib boʻlib kelgan.
Bu safar ham "Real" uchun oʻyinda ustunlikni qoʻlga kiritish oson kechmadi. Vinisius Junior chap qanotda faol boʻlib, hujumlarni uyushtirdi, biroq himoyada ham oʻz vazifasini bajarishga urindi.
20-daqiqada "Rayo" futbolchisi Andrey Ratsu keskin pasni qabul qilib, jarima maydonchasiga kirib bordi va darvozaga zarba berdi, ammo Thibaut Kurtua bu zarbani qaytarishga muvaffaq boʻldi. "Real" ham oʻz imkoniyatlarini yaratdi.
Kiliyan Mbappe qanotdan uzatma berdi, Bellingem bosh bilan kurashdi, Vinisius esa toʻpni egallab zarba berdi, lekin mezbon darvozaboni Avgusto Batallya toʻpni burchakka chiqarib yubordi. Keyinchalik Brahim Diasning uzatmasidan Raul Asensio bosh bilan zarba berdi, ammo darvozani aniq nishonga ololmadi.
Ikkinchi boʻlimda ham oʻyin koʻproq teng kurashlarda oʻtdi. "Rayo Valyekano" futbolchilari himoyada mustahkam turishdi va qarshi hujumlar uyushtirishga harakat qilishdi.
90-daqiqada mezbonlar gʻalabani ilib ketishlari mumkin edi, ammo Oskar Valentinning zarbasi aniq boʻlmadi. Natijada, "Real Madrid" ushbu mavsumda ilk bor durang oʻynadi va jamoa 12 oʻyindan keyin 31 ochkoga ega boʻldi.
Agar "Barselona" navbatdagi oʻyinda "Selta"ni magʻlub etsa, "Real"dan faqat uch ochko orqada boʻladi.
Mehmon guruhidagi foydalanuvchilar ushbu nashrga izoh qoldira olmaydi.
