Germaniya Bundesligasida o‘ynayotgan “Volfsburg” klubi o‘zining bosh murabbiyi Paul Simonis bilan hamkorlikni to‘xtatdi, deb xabar berdi jamoa matbuot xizmati.
Ma’lumotlarga ko‘ra, “bo‘rilar” so‘nggi uchta bahsda, jumladan Germaniya Kubogida ham mag‘lubiyatga uchragan. Bu natijalar jamoani turnir jadvalida xavfli hududga yaqinlashtirib qo‘ydi — “Volfsburg” hozirgi paytda 10-turdan so‘ng 14-o‘rinda joylashgan.
Paul Simonis jamoani o‘tgan yozda qabul qilib olgandi. Ungacha u Niderlandiyaning “Gou Exed Igls” klubini boshqargan va yoshlar bilan ishlashdagi mahoratli murabbiy sifatida tanilgan edi. Biroq Germaniyadagi birinchi mavsumi omadsiz boshlandi — jamoa nafaqat ochko yo‘qotdi, balki o‘yin uslubida ham kutilgan darajadagi intizomni namoyish eta olmadi.
Klub rahbariyatining fikricha, natijalar va jamoa ruhiyatini yaxshilash uchun rahbarlikda o‘zgarishlar zarur. Shu bois, bosh murabbiy lavozimi vaqtinchalik tarzda “Volfsburg” yoshlar jamoasi ustozi Daniel Bauerga topshirildi. Uning asosiy vazifasi — jamoadagi ruhiy holatni tiklash va “Bayer”ga qarshi bo‘ladigan navbatdagi bahsga jamoani tayyorlash.
“Volfsburg”ning yangi rahbariyati klubning oldida turgan eng muhim vazifa — mavsum oxirigacha barqaror natija ko‘rsatish va yuqori o‘rinlarga qaytish ekanini ta’kidlamoqda. Shu bilan birga, jamoa muxlislari rahbariyatdan doimiy bosh murabbiy nomini tez fursatda e’lon qilishni kutib turibdi.
Kelasi bahs 22 noyabr, shanba kuni bo‘lib o‘tadi. Raqib — chempionlik uchun kurashayotgan “Bayer” va aynan shu o‘yin “Volfsburg” uchun yangi sahifa bo‘lishi mumkin.
“Zamin”ni Telegramʻda oʻqing!
