Qatarda o‘tkazilayotgan 17 yoshgacha bo‘lgan futbolchilar o‘rtasidagi Jahon chempionati qizg‘in pallaga kirdi. Bugun “J” guruhida ishtirok etayotgan O‘zbekiston yoshlar terma jamoasi guruh bosqichining hal qiluvchi — uchinchi turida Panamaga qarshi maydonga tushadi.
Islombek Ismoilov boshqaruvidagi jamoa avvalgi ikki turda 3 ochko to‘plab, hozircha guruh jadvalida ikkinchi o‘rinni egallab turibdi. Bu — jamoamizning pley-off bosqichiga chiqish imkoniyatini saqlab qolishini anglatadi. Shuning uchun ham bugungi bahs nafaqat g‘alaba, balki nufuz va ishonch uchun ham katta ahamiyatga ega.
Panama terma jamoasi esa bu vaqtgacha g‘alaba qo‘lga kirita olmagan va guruhda oxirgi pog‘onada bormoqda. Ammo shunga qaramasdan, raqib jamoa ham o‘z obro‘sini saqlab qolish maqsadida maydonda bor kuchini ishga solishi tabiiy. Shu bois bu kechadagi to‘qnashuv shiddatli va keskin bo‘lishi kutilmoqda.
Bahs Toshkent vaqti bilan soat 18:30 da start oladi. Shu vaqtda “J” guruhining ikkinchi o‘yini — Irlandiya va Paragvay o‘rtasidagi bellashuv ham boshlanadi. Guruhdagi vaziyat juda tor, har bir ochko hal qiluvchi ahamiyat kasb etmoqda.
Shu bilan birga, bugun chempionat doirasida boshqa guruhlarda ham bir qator qiziqarli uchrashuvlar bo‘lib o‘tadi. Masalan, “K” guruhida Uganda va Fransiya, Chili va Kanada jamoalari bahs olib boradi.
“K” guruhi
Uganda U-17 — Fransiya U-17 (17:30)
Chili U-17 — Kanada U-17 (17:30)
“I” guruhida Chexiya AQSHga qarshi maydonga chiqsa, Burkina-Faso Tojikiston bilan kurashadi.
“I” guruhi
Chexiya U-17 — AQSH U-17 (19:45)
Burkina-Faso U-17 — Tojikiston U-17 (19:45)
Shuningdek, “L” guruhida Saudiya Arabistoni Maliga, Yangi Zelandiya esa Avstriyaga qarshi bellashuv o‘tkazadi.
“L” guruhi
Saudiya Arabistoni U-17 — Mali U-17 (20:45)
Yangi Zelandiya U-17 — Avstriya U-17 (20:45)
O‘zbekiston U-17 terma jamoasi uchun bu o‘yin guruh bosqichini muvaffaqiyatli yakunlash va keyingi bosqichga yo‘l olish imkonini taqdim etadi. Yosh yigitlarimiz avvalgi bahslarda ko‘rsatgan intizom, jamoaviy uyin va ruhiy barqarorlikni saqlab qolishsa, muxlislarni yangi g‘alaba bilan xursand qilish ehtimoli yuqori.
Shuni ham aytish joizki, Islombek Ismoilov shogirdlari bu chempionatda faqat natija uchun emas, balki o‘z salohiyatini namoyish etish va mamlakat sharafini munosib himoya qilish uchun ham maydonga tushmoqda. Ular uchun har bir o‘yin — katta futbolga yo‘l ochuvchi sinov, har bir daqiqa — tajriba maktabi.
Bugungi bahs nafaqat musobaqadagi taqdirni, balki yosh avlodning irodasi va mahorat darajasini ham ko‘rsatadi. Muxlislar yurtimiz yoshlaridan yangi shiddat, jonkuyarlik va chiroyli o‘yin kutmoqda.
“Zamin”ni Telegramʻda oʻqing!
