Qatarda davom etayotgan o‘smirlar o‘rtasidagi jahon chempionati 1/8 final bellashuvlari qizg‘in pallaga kirdi. Mazkur hal qiluvchi bosqichda Islom Ismoilov boshchiligidagi O‘zbekiston U-17 terma jamoasi Italiya yoshlariga qarshi muhim o‘yinni o‘tkazdi. Afsuski, o‘yin 3:1 hisobida italiyaliklar foydasiga hal bo‘ldi va bizning yigitlar musobaqani ushbu bosqichda tark etdi.
Bellashuv juda shiddatli va yuqori tempda boshlandi. Italiya tezkor hujumlar bilan ustunlikka erishishga intildi va bu harakat o‘z samarasini berdi — 19-daqiqada Kampaniyello birinchi golni urdi. O‘zbekiston jamoasi esa to‘xtab qolmadi, ikkinchi taymda faollikni oshirib, 56-daqiqada Murodov a’lo zarba bilan hisobni tenglashtirdi.
Biroq o‘yin oxirida italiyaliklar yana ustunlikni qo‘lga kiritdi. 68-daqiqaga kelib Kampaniyello yana gol urib dubl qayd etdi. Oradan bor-yo‘g‘i ikki daqiqa o‘tib Idrisa zarbasi hisobni yanada yiriklashtirdi.
So‘nggi daqiqalarda Azizbek Erimbetov hisobni qisqartira oldi xolos.
Uchrashuvning so‘nggi daqiqalarida Aliyev maydondan chetlatildi, bu esa jamoaning vaziyatni o‘zgartira olish imkoniyatlarini yanada qisqartirdi.
JCH-2026. 1/8 final
Italiya – O‘zbekiston 3:2
Gollar: Tomas Kampaniyello (19, 68), Dauda Iddrisa (70) – Amirxon Murodov (56), Azizbek Erimbetov (90+3)
Italiya: Longoni, Marini (Mambuku, 59), Reggiani, Da Paoli, Idrisa, Prisko (Baralla, 72), Stefanoni, Makkaroni (Luongo, 59), Kampaniyello (Borasio, 84), Inasio, Elimogeyl (Lontani, 58).
O‘zbekiston: Shokirov, Musaxonov, Bahodirxonov, Murodov, Anvarov (Saidmurodov, 74), Hasanov, Erimbetov, Abdumo‘minov (Habibullayev, 46), Sodiqov (Rustamov, 74), Shukrullayev, Sarsenbayev (Aliyev, 66).
Ogohlantirishlar: Abubakir Shukurullayev (25), Azizbek Abdumo‘minov (40)
Chetlatish: Asilbek Aliyev (89)
Shu tariqa, O‘zbekiston o‘smirlar terma jamoasi qat’iyatli harakat qilgan bo‘lsa-da, Mundialni 1/8 finalda tark etdi. Murabbiylar shtabi va futbolchilar musobaqa davomida iroda, xarakter va o‘yin intizomini namoyon qilishgani bilan muxlislar hurmatini qozondilar.
Italyan jamoasi esa ushbu natija bilan chorak finalga chiqdi.
Yigitlarimizga keyingi musobaqalarda omad va kuch tilaymiz — ularning imkoniyati va salohiyati katta ekani yana bir bor namoyon bo‘ldi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
