Qatarda tashkil etilgan va 2026 yilgi jahon chempionatida ishtirok etadigan to‘rt mamlakat — O‘zbekiston, Eron, Misr hamda Kabo-Verde terma jamoalarini bir joyda to‘plagan “Al-Ain Cup” xalqaro turniri ma’lum ma’noda sinov maydoniga aylandi. Ushbu musobaqa har bir jamoa uchun imkoniyatlar, kuch nuqtalari va kamchiliklarni ko‘rsatib beruvchi muhim maydon bo‘ldi. Va aynan shu bahslar orasidan O‘zbekiston terma jamoasi g‘olib sifatida chiqishga muvaffaq bo‘ldi.
Dastlab, Oston O‘runovning ikki mahoratli zarbasi Misr terma jamoasini mag‘lub etishga zamin yaratdi. Muhammad Saloh boshchilik qiladigan raqibga qarshi 2:0 hisobidagi g‘alaba futbol ishqibozlariga katta ishonch bag‘ishladi. Shundan so‘ng eng muhim bahs — final qarama-qarshiligi Eronga qarshi kechdi.
Final dramatizmi 69-daqiqada yanada kuchaydi. Himoyachi Abdulla Abdullayev yo‘l qo‘ygan xato vaziyat tobora xavflilasha boshlaganda, Abduqodir Husanov raqibga qarshi hujumni to‘xtatish uchun qat’iy kirishdi. Biroq hakam bu harakatni qo‘pol deb baholab, yosh himoyachini to‘g‘ridan to‘g‘ri maydondan chetlatdi. Shundan so‘ng terma jamoamiz qariyb 20 daqiqa bir kishi kam bo‘lib o‘ynashga majbur bo‘ldi.
Eron futbolchilari tomonidan bosim kuchaydi, burchak to‘plari, xavfli zarbalar ko‘paydi. Ammo Fabio Kannavaro shogirdlari so‘nggi daqiqalargacha o‘zini yo‘qotmadi, intizomni saqladi va darvoza daxlsizligini mustahkam himoya qildi. Ayniqsa, Abduvohid Ne’matovning bir necha murakkab zarbani qaytargani jamoani o‘yinda ushlab qoldi.
Asosiy vaqtda hisob ochilmagani bois, g‘olibni penaltilar aniqladi. Asablarni titratgan musobaqada yana Ne’matov qahramonga aylandi. Uning qutqaruvlari o‘z samarasini berdi va O‘zbekiston 4:3 hisobida zafar quchib, “Al-Ain Cup” musobaqasining bosh sovrinini qo‘lga kiritdi.
Musobaqadan keyin xorijiy ekspertlar ham bu finalni atroflicha muhokama qilmoqda. Xususan, futbol tahlilchisi Nikolay Yegorichev Abduqodir Husanovning maydondan chetlatilgan vaziyatiga alohida to‘xtaldi. Uning fikricha, himoyachi vaziyatni to‘pga tashlanish orqali emas, balki pozitsion to‘g‘ri tanlov orqali bartaraf etishi mumkin edi.
Yegorichev shu bilan birga Fabio Kannavaro sobiq dunyo darajasidagi himoyachi sifatida mazkur xatoni Abduqodir bilan individual tahlil qilib chiqishi tabiiy ekanini ta’kidladi. Uningcha, bu vaziyat yosh himoyachi uchun katta dars, terma jamoa uchun esa qimmatli xulosa bo‘lishi mumkin.
Shunga qaramasdan, O‘zbekistonning umumiy o‘yini, intizomi va xarakterini tan olmaslikning iloji yo‘q. Jamoa bir kishi kam bo‘lib ham raqib bosimiga dosh berdi, penaltilarda esa baribir o‘z so‘zini ayta oldi. Bu g‘alaba — jamoaning ruhi, chiqishish kuchini va jahon chempionatiga tayyorgarlik qog‘ozda emas, amalda o‘sib borayotganini ko‘rsatadi.
Al-Aynda qayd etilgan ushbu zafar futbolchilar, murabbiylar va har bir muxlis uchun qimmatli hissiyot bo‘lib qoldi. Jamoamiz sinovdan o‘tdi va undan yanada kuchliroq holda chiqdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
