Saudiya Arabistonida faoliyat olib borayotgan yulduzlar soni yil sayin ko‘payib bormoqda. Ular orasida “Al-Ittihod” hujumchisi Karim Benzema ham bor. Yaqinda u sobiq jamoadoshi, hozir “An-Nasr” safida o‘ynayotgan Krishtianu Ronaldu bilan munosabati haqida fikr bildirib o‘tdi. Ularning yo‘llari Madridning “Real” klubida uzoq yillar kesishgan va katta yutuqlar aynan birgalikda kelgandi.
Benzemaning aytishicha, Saudiya futboli yevropalik yulduzlarning tajribasiga muhtoj. Shu bois, Ronaldu kabi katta o‘yinchilarning ligada bo‘lishi mahalliy yoshlarga yangi eshik ochadi, ularga katta futbolga qanday yetib borish mumkinligini ko‘rsatadi. Hujumchi mamlakatdagi muhit uni hayratga solayotganini ham yashirmadi — odamlar hurmat bilan munosabatda bo‘lishadi, futbolga qiziqish esa kun sayin ortib bormoqda.
Yaqinda “An-Nasr” va “Al-Ittihod” to‘qnashuvida Ronaldu hamda Benzemaning maydondagi salomlashuvi sovuq ko‘ringani jurnalistlar orasida katta muhokama bo‘ldi. Ammo Karim bu vaziyatni sodda va tushunarli izohladi:
— Jurnalistlarning nima qilishini bilasiz. Biz o‘yin oldidan minbar ostidagi xonada uchrashdik, gaplashdik, hatto quchoqlashdik. Maydonga chiqqanimizda yana takrorlash shart emas. Nima uchun bir xil narsani ikki marta qilishimiz kerak? Biz bir-birimizni hurmat qilamiz, haqiqiy munosabat shu yerda. Kamera oldida rol o‘ynab yurishimiz kerak emas. Maydonga chiqqanimizda esa har birimiz o‘z ishimizga e’tibor qaratamiz.
Uning ta’kidlashicha, Ronaldu bilan munosabat mustahkam va samimiyligicha qolgan. Ular birgalikda bizning davrning eng kuchli hujum chizig‘ini tashkil qilgan va bugungacha bir-biridan ko‘p narsa o‘rganishda davom etishadi.
Zohirdagi sovuqlik ortida voqelik butunlay boshqacha ekani Benzemaning kamtarona, lekin chuqur ma’noli izohi bilan yana bir bor tasdiqlandi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
