Turkiya Superligasining 13-turida o‘zbekistonlik muxlislar katta qiziqish bilan kuzatib borayotgan “Istanbul Bashakshehir” jamoasi o‘z maydonida kuchli raqib — “Trabzonspor”ni qabul qiladi. Musobaqaning bu bosqichi har ikki jamoa uchun juda muhim, ayniqsa istanbulliklar uchun bu bahs mavsumdagi og‘ir vaziyatdan chiqish imkoniyatlaridan biri bo‘lib turibdi.
“Bashakshehir” kuchli tarkib, tajribali murabbiy va o‘z uyida o‘ynayotganiga qaramay, mavsum startidagi ishonchlarni oqlay olmayapti. Jamoa hozirda jadvalning pastki qismiga tushib qolgan — 13-o‘rin bu klub ambitsiyalariga mutlaqo mos kelmaydi. O‘z navbatida, raqib “Trabzonspor” barqaror o‘yini bilan chempionlik mavqelarini kuzatib bormoqda va uchinchi o‘rinni egallab turibdi.
Shaxin bilan boshlangan umid, lekin natija hamon past
“Bashakshehir” mavsumni juda omadsiz boshladi. Jamoadagi qator jarohatlar, hujumdagi bog‘lanishning yo‘qligi va raqiblar ustidan ustunlik o‘rnatishdagi muammolar vaziyatni og‘irlashtirdi. Omadsiz seriyadan so‘ng klub Nuri Shaxinni bosh murabbiy etib tayinladi. Uning kelishi muxlislar uchun katta umid uyg‘otgan bo‘lsa-da, natijalar hali barqarorlashmadi.
Istanbulliklar bir necha o‘yinda yaxshi taassurot qoldirdi: “Antalyaspor”ga qarshi 4:0, “Kojaelispor”ga 1:0 hisobidagi g‘alabalar umidlarni kuchaytirdi. Biroq keyingi turda past pog‘onadagi “Genchlerbirligi”ga 1:2 hisobida mag‘lub bo‘lish yana vaziyatni taranglashtirdi.
Shomurodov jamoaning asosiy ustuniga aylandi
“Bashakshehir”ning bu mavsumdagi eng porloq o‘yinchisi — o‘zbekistonlik Eldor Shomurodov. U 12 ta uchrashuvda 8 gol urib, jamoasida hamon “ishlab turgan” yagona kuchga aylanib ulgurdi. Biroq jamoada unga yetarlicha yordam beruvchi boshqa to‘purarlar yetishmayapti. Faqat Ivan Brnich va Nunu Koshta ikkitadan gol bilan unga ko‘maklasha olmoqda.
Abbosbek Fayzullayev esa jarohatdan tiklanish arafasida. U bir yarim oydan beri safdan chetda bo‘ldi va terma jamoaga borolmadi. Lekin endi jamoaga qaytishga yaqin. Yusuf Sarining jarohati va Operining sog‘liq muammolari hujum va qanotlardagi muammolarni yanada kuchaytirgan.
Shunga qaramay, “Bashakshehir” uy o‘yinlarida deyarli har bahsda gol urib kelmoqda. Faqat “Eyyupspor”ga qarshi o‘yinda to‘p kiritilmagan.
“Trabzonspor” mag‘lubiyatni unutdi — seriya yetti o‘yinga yetdi
Qora dengiz jamoasi so‘nggi yetti uchrashuvda mag‘lubiyatni tatib ko‘rmadi. Tanaffusgacha ular “Gaziantep BB” bilan durang o‘ynadi, keyin to‘rtta golli ikki bahs o‘tkazdi va ikkita g‘alabaga erishdi. “Galatasaroy”ga qarshi safardagi 0:0 va “Alanyaspor”ga qarshi 1:1 o‘yinlari jamoaning ahvolini barqaror ekanini ko‘rsatdi.
Tarkib ham deyarli to‘liq: Stefan Savichdan tashqari asosiy yo‘qotish yo‘q. Uning o‘rnini nominal yarim himoyachi Okay Yokushlu muvaffaqiyatli to‘ldirmoqda. Entoni Nvakaeme esa uzoq vaqtdan beri o‘ynamayapti va ro‘yxatdan chiqarilgan.
O‘zaro o‘yinlarda ustunlik — “Trabzonspor” tomonida
So‘nggi to‘rtta o‘yinning barchasida trabzonliklar “Bashakshehir”ni gol o‘tkazmasdan mag‘lub etgan. Umumiy tarixda ham ustunlik “Trabzonspor”da — 14 g‘alaba, raqibda 10.
Hozirgi holat va formaga qaralsa, mehmonlar seriyani davom ettirish uchun yaxshi imkoniyatga ega.
Ikki hujumchi — ikki maqsad, bitta maydon
Gol uruvchilar poygasida ikki superhujumchi yetakchilik qilmoqda:
– Eldor Shomurodov (“Bashakshehir”) — 8 gol (1 penalti)
– Pol Onuachu (“Trabzonspor”) — 8 gol (2 penalti)
Ular o‘rtasidagi to‘qnashuv haqiqiy shou bo‘lishi kutilyapti.
Taxminiy tarkiblar
“Bashakshehir”:
Shengezer, Opoku, Duarte, Shaxiner, Ebosele, O‘zdemir, Gyunesh, Arit, Krespo, Tyuryuch, Shomurodov.
“Trabzonspor”:
Onana, Yokushlu, Baniya, Pinya, Eskixellach, Jabol-Folkarelli, Ulai, Zubkov, Augusto, Olaigbe, Onuachu.
Uchrashuv 24-noyabr kuni Toshkent vaqti bilan 22:00 da start oladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
