«Barselona» klubi prezidenti Joan Laporta jamoaning sobiq ustozi Xavi Ernandesning lavozimidan ozod etilishiga olib kelgan murakkab jarayon sabablarini ochiqladi. Klub rahbarining so‘zlariga ko‘ra, murabbiyning ziddiyatli bayonotlari uning yakuniy qaroriga ta’sir qilgan.
Ishonch va ikki yil
Laportaning aytishicha, dastlab Xavi mavsum yakunida klubdan ketishini e’lon qilgan. Biroq oradan ko‘p o‘tmay, u prezident bilan uchrashib, vaziyatni qayta ko‘rib chiqishni iltimos qilgan. Asosiy muammo aynan shundan keyin boshlangan.
«Men undan: «Jamoaga ishonching komilmi?» deb so‘radim. U: «100 foiz ishonaman, bu futbolchilar bilan zafar quchamiz», — deb javob berdi. Ammo oradan atigi bir hafta o‘tgach, menga kuchli tarkibni shakllantirish uchun yana ikki yil kerakligini eshitdim. Shu paytda o‘zimga: «Aslida nimalar yuz bermoqda?» degan savolni berdim», — deya Laportaning so‘zlarini keltiradi BarcaTimes.
Transfer talablari
Prezidentning qo‘shimcha qilishicha, bundan so‘ng Xavi klubning sport direktori Deku bilan aloqaga chiqib, jamoaga shoshilinch yangi transferlar zarurligini va ayrim futbolchilar bo‘yicha qo‘shimcha ma’lumot olishni talab qilgan. Bu esa uning avvalgi "100 foiz ishonaman" degan so‘zlariga zid edi.
Yakuniy qaror
Joan Laporta sobiq murabbiyga bo‘lgan ehtiromi yuqori ekanini qayd etdi. Biroq murabbiy tomonidan berilgan bunday qarama-qarshi va doimiy o‘zgaruvchan fikrlar klub rahbari uchun boshqaruv qarorini chiqarishni juda qiyinlashtirgan va natijada jamoa ustozini o‘zgartirish zarurati tug‘ilgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
