Ukraina ruhiyatidan olingan saboq
Ukrainaning “Shaxtyor” klubi bosh murabbiyi Arda Turon Konferensiyalar Ligasi doirasida Irlandiyada “Shemrok Rovers”ga qarshi kechgan (2:1 hisobidagi g‘alaba) uchrashuvdan so‘ng o‘z fikrlarini bayon etdi. Turkiyalik tajribali mutaxassis jamoa Dublinga yetib olish uchun safarga ko‘p vaqt sarflaganini, 16 soatlik yo‘ldan so‘ng to‘laqonli mashg‘ulot o‘tkazishning imkoni yo‘q bo‘lganini aytdi.
Arda Turon eng katta saboqni ukrainaliklardan olganini yashirmadi. “Men hamma narsaga ijobiy baho berishga harakat qilaman. Buni kimdan o‘rganganimni aytaymi? Ukrainaliklardan. Men u yerga boraman, bombalar yog‘iladi, ular esa xotirjamlik bilan: «Bu shunchaki raketa», deyishadi. Ular uchun dron muammo emas. Ularni juda hurmat qilaman”, — dedi murabbiy, ukrainaliklarning og‘ir damlarda ijobiy munosabatda bo‘lish ruhini ta’kidlab.
Liderlarga keskin murojaat
Shuningdek, Turon jahon liderlariga — Tramp, Putin, Erdo‘g‘an, Zelenskiyga keskin murojaat qildi: “Hozir urushning vaqti emas. Bolalar urush haqida emas, Mars yoki boshqa narsalar haqida o‘ylashi kerak edi. Agar Kiyevda loaqal bir tunni o‘tkazsangiz, shundagina futbol haqida gapira olasiz”. U ukrainaliklarni yaxshi ko‘rishini, ularni oilasidek bo‘lib qolganini his qilishini qo‘shimcha qildi.
38 yoshli Arda Turon 2025 yil may oyidan beri «Shaxtyor» klubini boshqarmoqda. Hozirda “Shaxtyor” Konferensiyalar Ligasida 9 ochko bilan peshqadamlik qilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
