Ispaniya milliy jamoasi bosh murabbiyi Luis de la Fuente Jahon chempionati–2026 guruh bosqichi qur’asidan keyin o‘z munosabatini bildirdi. Unga ko‘ra, Ispaniya tushgan “H” guruhi qattiq raqobatga to‘la, har bir bellashuv o‘ziga xos sinov bo‘ladi.
Murabbiy avvalombor qur’aning umumiy mazmuniga to‘xtaldi: «48 ta jamoa qatnashadigan musobaqada oson raqib degani yo‘q. Har bir terma o‘z o‘yiniga ega, o‘z uslubi bilan xavf soladi. Guruhlarni ko‘rgach, butun dunyo murabbiylari bir fikrda bo‘lsa kerak — raqobat darajasi juda yuqori», — dedi de la Fuente.
U Ispaniya uchun guruhda birinchi o‘rinni qo‘lga kiritish o‘ta muhimligini ta’kidladi. Chunki keyingi bosqichdagi ehtimoliy raqiblar aynan shu o‘ringa bog‘liq bo‘ladi. «Yaqinda Argentina bosh murabbiyi Lionel Skaloni bilan bir oz suhbatlashdik — agar ikki jamoa pley-offda yo‘l kesishsa, bunday bellashuv ajoyib bo‘ladi. Ammo bizning asosiy vazifamiz — o‘z o‘yinimizga e’tibor qaratish. Birinchi o‘rin uchun kurashamiz, chunki bu pley-offdagi yo‘limizni yengillashtiradi», — dedi u.
De la Fuentega ko‘ra, Ispaniya uchun dastlabki ikki o‘yin hal qiluvchi ahamiyatga ega bo‘ladi. Unga ko‘ra, raqiblar katta ehtiyotkorlikni talab qiladi:
«Kabo-Verde mundialda debyut qilayapti — bunday jamoalar odatda ilk o‘yinlarida juda ruhlanib chiqadi. Saudiya Arabistoni esa so‘nggi jahon chempionatida Argentinani mag‘lub etgani bilan isbot bergan. Shuning uchun hech bir raqibni yengil qabul qilmaslik kerak».
Urugvayga qarshi oxirgi turdagi bellashuv esa guruh taqdirini hal qilishi mumkin. Lekin murabbiy uchala o‘yin ham bir xil darajada murakkab ekanini ta’kidladi: «Avvalgi ikki o‘yinda qanday natija olishimizga qarab, Urugvayga qarshi qizg‘in bahsga tayyorgarlik ko‘ramiz. Ammo shaxsan men uchun har uchalasi bir xil qiyin».
Ma’lumot uchun, Ispaniya H guruhida Kabo-Verde, Saudiya Arabistoni va Urugvay bilan birga. Amaldagi Yevropa chempionlari bu bosqichda ham o‘z so‘zini aytishni maqsad qilib turibdi.
Muxlislar esa jamoadan yana yangi tarix, yangi g‘alabalar va yorqin futbol kutishmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
