Yevropa futbolida “Manchester Yunayted”, “Everton”, “Manchester Siti”, “Sautgempton”, “Reynjers” va “Fiorentina” kabi yirik klublar sharafini himoya qilgan, keyinchalik murabbiylik faoliyatida ikki bor “Navbahor”ni boshqargan rossiyalik mutaxassis Andrey Kanchelskis o‘zbek futboli haqida fikr bildirib, jamoatchilikning e’tiborini o‘ziga qaratdi.
Uning ta’kidlashicha, O‘zbekiston futboli yil sayin shiddat bilan rivojlanib, global miqyosda o‘z o‘rnini mustahkamlab bormoqda. “O‘zbekiston milliy terma jamoasining jahon chempionatiga chiqishi tasodif emas. Ular tizimli ishlayotgan, tarbiyalanayotgan avlod kuchli va intizomli,” — dedi Kanchelskis.
Rossiya klublarini Osiyo bozoriga e’tibor qaratmaslikda ayblagan mutaxassis quyidagilarni qo‘shimcha qildi:
“Bizga yaqin, do‘stona munosabatdagi hududda ko‘plab talantli futbolchilar bor. Rossiya klublari o‘zbek futbolchilariga jiddiy qaray boshlashi kerak.”
Abduqodir Husanov — o‘zbek futbolining yangi yuzi
Bugungi kunda o‘zbek futboli haqida gap ketganda birinchi tilga olinayotgan ism — Abduqodir Husanov. 21 yoshli himoyachi “Bunyodkor” tizimida shakllangan, keyin Belarusning “Energetik-BGU” klubida professional faoliyatini boshlagan.
E’tiborlisi, u hozirgi kunda Fransiya va Angliya chempionatlarida maydonga tushgan birinchi va yagona o‘zbek futbolchisi sifatida tarixga kirgan. Transfermarkt ekspertlari ham Abduqodirning bag‘rikeng salohiyatini e’tirof etib, uni 35 million yevroga baholagan — bu esa uni Markaziy Osiyodagi eng qimmatbaho o‘yinchiga aylantiradi.
Tarixiy yo‘llanma va o‘zbek legionerlari avlodi
O‘zbekiston milliy terma jamoasining ilk bor jahon chempionatiga yo‘l olishi – futbolimizda yangi davr boshlanishining eng yorqin dalili. Bu jarayonda faqat Husanov emas, balki ko‘plab legionerlar ham o‘z hissasini qo‘shmoqda.
Italiya A Seriyasida “Jenoa”, “Spetsiya”, “Kalyari” va “Roma” kabi klublarda to‘p surgan Eldor Shomurodov bu mavsum Turkiyaning “Istanbul Bashakshehir” jamoasiga qo‘shildi va yangi sahifa ochdi.
Rossiya kubogi va Superkubogi sohibini aniqlashda muhim rol o‘ynagan Abbosbek Fayzullayev ham ayni paytda “Bashakshehir”da o‘zining ilk golini urdi. Husniddin Aliqulov esa Turkiyaning “Rizespor” klubida bir necha yildirki asosiy tarkibda o‘ynab kelmoqda.
Osiyo va arab davlatlaridagi o‘zbek legionerlari
Eron chempionatida Rustam Ashurmatov, Odiljon Hamrobekov, Jaloliddin Masharipov, Oston O‘runov va O‘tkir Yusupov kabi futbolchilarimiz o‘z nomini mustahkamlab ulgurgan.
Arab mamlakatlarida esa Otabek Shukurov, Abdulla Abdullayev, Aziz G‘aniyev va Akmal Mozgovoylar yurtimiz sharafini munosib himoya qilmoqda.
Xulosa o‘rnida aytish mumkinki, Andrey Kanchelskis ta’kidlaganidek, o‘zbek futboli hozirgi kunda jahon futbol xaritasida tobora muhim o‘rin egallab bormoqda. Yurtimizdagi yangi avlod legionerlari — bunga yorqin isbot.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
