Beshta vazn toifasida mag‘lubiyatsiz jahon chempioni bo‘lgan amerikalik bokschi Terens Krouford professional faoliyatiga yakun yasaganini rasman e’lon qildi. Bu qaror jahon boksi muxlislari uchun kutilmagan, biroq tarixiy yangilik sifatida qabul qilindi.
Hozirda 38 yoshni qarshilagan Krouford katta sportga 2008 yilda qadam qo‘ygan edi. Ilk yillardanoq u ringdagi sovuqqonlik, texnika va zarbalar aniqligi bilan ajralib turardi. 2014 yilda u yengil vazn toifasida jahon chempioni unvonini qo‘lga kiritib, katta chempionlik yo‘lini ochdi.
2017 yil Krouford uchun burilish nuqtasi bo‘ldi — u birinchi yarim o‘rta vaznda mutlaq chempionga aylanib, barcha asosiy kamarlarni birlashtirdi. Keyingi yillarda esa u o‘z salohiyatini yanada yuqori vaznlarda ham isbotladi.
2023 yilda o‘rta vaznda, 2024 yilda birinchi o‘rta vaznda, 2025 yilda esa ikkinchi o‘rta vaznda mutlaq jahon chempioni bo‘lib, boks tarixida noyob yutuqqa erishdi. Beshta turli vazn toifasida chempionlik — bu har qanday sportchi uchun orzu qilib bo‘lmas darajadagi natija.
Faoliyati davomida Terens Krouford jami 42 ta jang o‘tkazdi va ularning barchasida g‘alaba qozondi. E’tiborlisi, 31 ta jang nokaut bilan yakunlangan bo‘lib, bu uning zarba kuchi va ringdagi ustunligini yaqqol namoyon etadi.
Krouford boksni mag‘lubiyatsiz tark etmoqda. Uning nomi nafaqat chempionlik kamarlari, balki sabr, mehnat va sportga sadoqat ramzi sifatida ham tarixda qoladi. Muxlislar esa uning faoliyatini uzoq yillar davomida hurmat bilan eslab yuradi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
