Safonov jarohat tufayli PSJda yana zaxiraga qaytishi mumkin

Matvey Safonov futbol tarixiga kirib qoldi: u Qit'alararo kubok finalida ketma-ket to'rtta penaltini qaytardi. Keyinroq ma'lum bo'ldiki, darvozabon buni chap qo'li singan holda amalga oshirgan.

Biroq aynan shu jarohat uni kamida bir oyga safdan chiqardi va PSJdagi asosiy tarkibdagi o'rni yana savol ostida qoldi. 17 dekabr kuni Safonov “Flamengo”ga qarshi penaltilar seriyasida parijliklarni g'alabaga olib chiqdi.

U FIFA musobaqalari tarixida ketma-ket to'rtta penaltini qaytargan ilk darvozabonga aylandi hamda o'yinning eng yaxshi futbolchisi sovrinini oldi. Bayram paytida u og'riq alomatlarini sezdirmadi: jamoadoshlari uni havoga irg'itdi, u kubokni ikki qo'li bilan ko'tardi va kameralar qarshisida jilmaydi.

19 dekabrda esa PSJ Safonovning chap qo'l panjasida sinish borligini va u kamida uch hafta o'ynay olmasligini ma'lum qildi. Bosh murabbiy Luis Enrike vaziyatni shunday izohladi: futbolchining o'zi ham jarohat qachon va qanday yuz berganini aniq tushunmayapti.

Murabbiylar shtabi sinish uchinchi penalti epizodida, Safonov g'alati harakat qilgan paytda sodir bo'lgan bo'lishi mumkin, degan taxminni ilgari surdi. Shu tariqa, Matvey kamida so'nggi ikki zarbani jarohat bilan qaytargani ehtimoli bor.

Bu adrenalin, xarakter yoki ijtimoiy tarmoqlarda hazillashilayotganidek, og'riqni sezmaslik emas, ammo epizod baribir hayratlanarli. Mutaxassislar turli taxminlarni aytmoqda.

Sport shifokori Nikita Karlitskiy darvozabonlar orasida tez-tez uchraydigan barmoq sinishi bo'lishi mumkinligini qayd etadi: ko'pchilik bunday holatlarda ham o'yinni davom ettiradi, barmoqlar esa ko'p miqdorda teyp bilan mustahkamlanadi. Sport tibbiyoti milliy markazi bosh shifokori Mixail Butovskiy esa ehtiyotkorona yondashib, aynan qaysi suyak shikastlangani va PSJ shifokorlari qaysi davolash usulini tanlashini bilmasdan turib xulosa qilish qiyinligini ta'kidlaydi.

Safonovning jasorati e'tirof etilsa-da, endi bu fidoyilik uning asosiy tarkibdagi maqomiga ta'sir qilishi ham mumkin. Fransiyadagi faoliyati davomida u ko'p vaqtini zaxirada o'tkazdi: avval Janluiji Donnarumma, keyin Lyuk Shevalye ortidan imkon kutdi.

Shevalye to'piqdan jarohat olgach, Safonov nihoyat soyadan chiqdi va go'yo asosiy darvozabonlikni mustahkamlagandek ko'ringandi. Endi esa sinish sabab vaziyat yana o'zgardi.

Shevalye ikkinchi imkoniyatni olmoqda va ayni paytda mas'uliyat ham nihoyatda yuqori. 4 yanvar kuni PSJ Liga 1 doirasida XXI asrdagi ilk Parij derbisida “Parij” klubiga qarshi maydonga tushadi.

8 yanvar kuni esa Fransiya Superkubogi finalida “Marsel”ga qarshi o'yin bor. Bunday uchrashuvlarda xatolar kechirilmaydi: darvozabon barqarorligini isbotlasa, posbonlar ierarxiyasi masalasi yana qayta ochilishi mumkin.

Shevalyening bu mavsumdagi ko'rsatkichlari o'rtacha: 20 o'yinda 22 gol o'tkazib yuborgan, 8 uchrashuvda darvozasi daxlsiz qolgan, zarbalarni qaytarish foizi 70 foizdan past. Uning “Tottenhem”ga qarshi UEFA Superkubogidagi debyuti ham bahsli baholangan: penaltilar seriyasida qahramonlik ko'rsatgan, biroq asosiy vaqtda ishonchsiz epizodlari bo'lgan.

Savol shundaki, Shevalye hozirgi bosimga dosh bera oladimi? Axir uning ortida Qatardagi finalda afsonaviy o'yin ko'rsatgan Safonovning nufuzi turibdi.

Safonov esa vaziyatga falsafiy qaramoqda. U telegram kanalida shunday yozdi: “Ishlashda davom etamiz va oldinga yuramiz, bu yerda to'xtab bo'lmaydi.

Bilasiz: nima bo'lishidan qat'i nazar, meni sindirib bo'lmaydi”. Luis Enrike ham tezroq tiklanishiga ishonadi: Safonovning mentaliteti va xarakteri kuchli, shu bois u odatdagidan tezroq safga qaytishi mumkin.

Hatто Shevalye asosiy tarkibda mustahkamlanib qolsa ham, Safonov uchun hammasi yomon emas. Qit'alararo kubok finalidagi o'yin uning Yevropa bozoridagi nufuzini keskin oshirdi.

Endi u top-klublar rahbariyati diqqat markazida. Masalan, “Manchester Yunayted” David de Xeа ketganidan beri barqaror birinchi raqamni topa olmayapti.

Final taqdirini hal qila oladigan, penaltilar seriyasida raqibga psixologik bosim o'tkaza oladigan darvozabon esa kamyob. Boshqa masala: PSJ bunday futbolchini qo'yib yuboradimi?

Safonovning shartnomasi 2027 yilgacha amal qiladi. Bir nechta sovrin uchun kurashadigan klubda ikki kuchli darvozabonga ega bo'lish mantiqan to'g'ri.

Ammo bu Safonovni qoniqtiradimi? U allaqachon zaxira o'rindig'idan ko'ra kattaroq rolga loyiq ekanini isbotlab bo'ldi.

Hozir esa rossiyalik darvozabonga tiklanish uchun vaqt kerak. Bu orada Shevalye yo'qotilgan pozitsiyalarini qaytarishga urinadi.

Aynan shu davr hammasini o'zgartirishi mumkin. Yoki hech narsani o'zgartirmasligi ham ehtimol: Safonov Qatarda ko'rsatgan o'yindan keyin uni unutishning o'zi qiyin.

Sobiq darvozabon Anzor Kavazashvili vaziyatni achinish bilan baholadi: Safonov bir yarim yil navbat kutdi, yorqin o'ynadi, keyin esa kutilmaganda shunday baxtsizlik yuz berdi. Haqiqatan ham alamli.

Biroq Safonov allaqachon asosiy haqiqatni ko'rsatdi: rossiyalik sportchilarni sindirish oson emas, hatto sinish jarohatlari bilan ham. “Zamin”ni Telegramʻda oʻqing!