Madridning «Real» klubi rahbariyatida katta rejalar pishib yetilayapti. Manbalarga ko‘ra, klub prezidenti Florentino Peres fransuz futbol afsonasi Zinedin Zidanni yana “qaymoqranglilar” bosh murabbiyi sifatida ko‘rishni qat’iy maqsad qilgan.
Qayd etilishicha, Peres 53 yoshli mutaxassisni Fransiya milliy terma jamoasi bilan ehtimoliy kelishuvdan voz kechib, 2026 yildan boshlab "Real Madrid"ni yana boshqarishga ko‘ndirish niyatida. Klub rahbariyati Zidanni “Real” tarixi bilan bog‘liq chuqur sinovdan o‘tgan va katta bosim ostida ishlashni yaxshi biladigan murabbiy sifatida ko‘rmoqda.
Zidan uchun Madrid begona joy emas. U 2013/14 yilgi mavsumda jamoada yordamchi murabbiy sifatida faoliyat yuritgan, keyinchalik 2016–2018 hamda 2019–2021 yillarda asosiy jamoani boshqargan. Ana shu davrda “Real” ikki marta Ispaniya chempioni bo‘ldi va eng muhimi — uch marta ketma-ket Chempionlar ligasi kubogini qo‘lga kiritib, Yevropa futboli tarixida o‘chmas iz qoldirdi.
Ayni paytda esa madridliklar rulida Xabi Alonso turibdi. U 2025 yil may oyidan jamoani boshqarib kelyapti. La Liganing 2025/26 yilgi mavsumi 18-turidan keyin “qaymoqranglilar” 42 ochko bilan musobaqa jadvalida ikkinchi pog‘onadan joy olgan.
Shu bilan birga, klub ichida kelajak haqida jiddiy o‘ylanishlar boshlangan. Agar Peres rejasi amalga oshsa, “Santyago Bernabeu”da yana bir bor Zidan davri boshlanishi mumkin. Bu esa muxlislar uchun nafaqat nostalgiya, balki katta umidlar qaytishi demakdir.
Mehmon guruhidagi foydalanuvchilar ushbu nashrga izoh qoldira olmaydi.
