Turkiya chempionatining ikkinchi davrasi “Istanbul Bashakshehir” hamda “Fatih Karagyumryuk” jamoalari o‘rtasidagi bahs bilan start oldi. Uchrashuvda mezbonlar Eldor Shomurodov va Umar Ali Shaxinerning gollari hisobiga 2:1 hisobida g‘alaba qozonib, muhim uch ochkoni qo‘lga kiritdi.
Yevropa kuboklari yo‘llanmasi uchun jiddiy kurashayotgan “Istanbul Bashakshehir” 18-turdan keyin ochkolarini 26 taga yetkazib, turnir jadvalida kuchli beshlikka yanada yaqinlashdi. Jamoa uchun mavsumning bu qismida har bir ochko oltinga teng — raqobat qattiq, o‘yinlar esa xato kechirmaydigan darajada keskin.
Eldor Shomurodov esa yana bir bor o‘zining to‘purarlik salohiyatini isbotladi. U Superligadagi gollari sonini 13 taga yetkazib, to‘purarlar poygasida yakka peshqadam bo‘lib turibdi. Eng yaqin ta’qibchisi Aol Onuachudan ikki to‘pga ilgarilab olgani ham uning joriy mavsumda qanday formada ekanini ko‘rsatadi.
Uchrashuvdan keyin “Bashakshehir” bosh murabbiyi Nuri Shaxin o‘yin haqida fikr bildirdi va jamoa g‘alabasidagi asosiy nuqtalarni alohida qayd etdi. Uning so‘zlariga ko‘ra, bu natija ligada oson o‘yin yo‘qligini yana bir bor ko‘rsatgan.
Murabbiy birinchi taymda jamoa juda yaxshi harakat qilganini, hatto bu u kelganidan beri o‘tkazgan eng yaxshi bo‘limlardan biri bo‘lishi mumkinligini aytdi. Biroq, o‘sha paytda ikkinchi golni ura olmagani keyingi daqiqalarda o‘yinni murakkablashtirib yuborgan.
Ikkinchi yarimda ham “Bashakshehir” hisobni oshirish imkoniyatidan foydalana olmadi. “Fatih Karagyumryuk” esa yo‘qotadigan narsasi kam jamoa sifatida tavakkalga bordi va bu uslub o‘z samarasini berib, hisob 1:1 ko‘rinishiga keldi. Ana shu paytda, Nuri Shaxin ta’kidlaganidek, jamoaning reaksiyasi murabbiyni xursand qildi: sabr bilan o‘ynashdi, vaziyatlar yaratishdi va oxir-oqibat hal qiluvchi zarbani berishdi.
G‘alaba goli Umar Ali Shaxiner tomonidan kiritildi. Murabbiy bu golni “fantastik” deb baholab, aynan shunday g‘alabalarning qiymati juda baland ekanini ta’kidladi. Uning aytishicha, so‘nggi besh o‘yinning to‘rttasida g‘alaba va ketma-ket uchta zafar — jamoaning rivojlanish jarayonini tezlashtiradi, o‘yinga bo‘lgan ishonchni kuchaytiradi.
Nuri Shaxin Umar Ali Shaxiner haqida ham alohida to‘xtalib o‘tdi. Uning fikricha, bu futbolchi klub uchun juda muhim, yuqori darajada professional va bir necha pozitsiyada jamoaga yordam berib kelayotgan universal o‘yinchi. Bugun esa u so‘nggi haftalardagi yaxshi o‘yinini gol bilan “bezab” qo‘ydi.
Shomurodov masalasiga kelganda, murabbiy qiziq nuqtani aytdi: Eldorning to‘purar bo‘lib chiqishi — albatta yoqimli, ammo hal qiluvchi maqsad emas. Asosiysi — jamoa mavsum oxirida o‘z maqsadlariga yetib borishi, Eldorning esa o‘sha yo‘ldagi ulkan hissasi.
Murabbiy, ayniqsa, Shomurodovning to‘psiz harakatlarini ham yuqori baholadi: maydondagi mehnat, pressing, pozitsiya tanlash va jamoaviy o‘yinga qo‘shayotgan hissa — “faqat gol” bilan o‘lchanmaydigan muhim jihatlar ekanini uqtirdi. Nuri Shaxin Eldorni kuchli xarakterga ega inson, haqiqiy yulduz deb atab, u bilan ishlash juda osonligini ham qo‘shimcha qildi.
Endi “Istanbul Bashakshehir” Turkiya chempionatidagi keyingi bellashuvini 25 yanvar kuni o‘tkazadi. Shu sanada Shomurodov jamoasi “Kayserispor” mehmoni bo‘ladi. Mezbonlar uchun ham, mehmonlar uchun ham bu bahs qimmat, ammo “Bashakshehir”ning bugungi kayfiyati va seriyasi muxlislarni yanada kattaroq natijalar kutdiryapti.
“Zamin”ni Telegramʻda oʻqing!
