19 yanvar kuni FIFA milliy terma jamoalar reytingining navbatdagi yangilangan ko‘rinishi e’lon qilindi. Unda O‘zbekiston milliy jamoasi ikki pog‘onaga quyilab, 52-o‘rindan joy oldi.
Shunga qaramay, “Oq bo‘rilar” Osiyo futbol konfederatsiyasi doirasida baribir yetakchilar safiga yaqin turibdi: yangi reytingda O‘zbekiston OFK bo‘yicha 5-o‘rinni egallagan. Osiyoda esa hozircha o‘zgarish yo‘q — Yaponiya birinchilikni qo‘ldan bermayapti. “Kunchiqar yurt” vakillari umumiy reytingda 19-pog‘onada qayd etilgan.
Yangilanishda Afrika Kubogi yakunlari ham o‘z ta’sirini ko‘rsatdi. Finalgacha yetib borgan Marokash reytingda yuqorilab, 8-o‘ringa chiqdi. Senegal esa g‘alabadan keyin jiddiy sakrash qildi — 7 pog‘onaga ko‘tarilib, 12-o‘rinni egalladi. Bu natijalar Afrika futbolida raqobat qanchalik qizg‘in ekanini yana bir bor isbotlab berdi.
Yangilangan reytingda dunyo futboli grandlari TOP-10 taligi quyidagicha ko‘rinish oldi:
1. Ispaniya
2. Argentina
3. Fransiya
4. Angliya
5. Braziliya
6. Portugaliya
7. Niderlandiya
8. Marokash
9. Belgiya
10. Germaniya
Qisqasi, O‘zbekiston ikki pog‘ona ortga surilgan bo‘lsa-da, Osiyo miqyosida baribir yuqori chiziqqa yaqin. Endi eng muhimi — keyingi o‘yinlarda ochko to‘plab, reytingdagi yo‘qotishni tezroq qoplash. Muxlislar esa odatdagidek bir narsani kutayapti: maydonda xarakter, natijada o‘sish.
“Zamin”ni Telegramʻda oʻqing!
