Krishtianu Ronaldu kelajagini go'yo bo'laklab sotayotgandek: har mavsum yangi gap-so'z, lekin “yakun” degan so'zga hech kim ishongisi kelmaydi. Jurnalist Ben Jeykobs bergan ma'lumotlarga ko'ra, portugaliyalik yulduz 2027 yilda “Al-Nasr”ni tark etishi mumkin. Bu haqda euro-football.ru xabar beradi.
Bir fakt o'zgarmaydi: Ronaldu 40 yoshda.
U faoliyati davomida 960 ta gol urdi va 1000 lik marraga yetishni qat'iy maqsad qilgan. Saudiya Arabistonidagi shartnomasi 2027 yilgacha, “Al-Nasr” safida esa 125 o'yinda 110 gol muallifi bo'lgan.
Bu raqamlar nafaqaga chiqishga shoshilmayotgan futbolchining hisobotini eslatadi. Ronaldu oilasi to'xtashni maslahat berishini yashirmaydi, ammo o'zi hamon klubiga va terma jamoaga foydasi tegayotganini aytadi. U tanasiga bo'lgan yondashuvni deyarli professional standartga aylantirgan: mushaklar — kapital, rekordlar esa — valuta.
Ronaldu A Bola nashriga bergan fikrida ham xuddi shu kayfiyatni takrorlagan:
“O'ylashimcha, men hali ham yaxshiman, klubim va terma jamoamga yordam beryapman, unda nega davom etmasligim kerak?”
Shu bilan birga, futbol olami unga boshqa yo'lni ham “muloyimlik bilan” ko'rsatmoqda. “Manchester Yunayted”, “Nyukasl”, “Vilyarreal” va “Fiorentina”da o'ynagan Juzeppe Rossi Goal.com bilan suhbatda Ronalduni Golivudga chorlab, hatto Joker kabi salbiy qahramon rolini ham tilga oldi. Fransiya terma jamoasi, “Arsenal” va “Barselona” sobiq yarim himoyachisi Emmanuel Peti esa Hochgepokertda bu g'oyani “Oskar” darajasigacha olib chiqdi.
Bu gaplar bejiz emas: Ronaldu allaqachon shaxsiy brend, butun bir franshizaga aylangan. Uning jarima maydonidan Warner Bros pavilyoniga o'tishi, “Al-Nasr”dan shunchaki “Benfika”ga qaytishidan ham mantiqiyroq tuyulishi mumkin. Kamera uni zarba kabi “sevadi” — shu ma'noda “yangi Joker” g'oyasi ham oddiy kasting qaroriga o'xshaydi. Axir tomoshabin bilan pauza qilib o'ynashni, keyin esa “Siu” bilan portlashni udek kim eplay oladi?
Asosiy ziddiyat esa kinoda ham, “Al-Nasr” uni ushlab qolish uchun ulushini 15 foizgacha oshirib berishi mumkinligi haqidagi mish-mishlarda ham emas. Eng katta savol — Ronaldu futboldan keyin ham o'ziga bo'lgan qiziqishni qanday saqlab qoladi. Uning atrofidagilar e'tibor pasayib ketmasligi ustida allaqachon bosh qotirayotgani aniq.
Yana bir detal ham bor: Madeyrada Ronaldu haykaliga o't qo'yishga urinish bo'ldi, politsiya vandalni qo'lga oldi. Ronaldu esa navbatdagi golidan keyin “Ishonishda davom etamiz, kurashishda davom etamiz” deya yozdi. Tasvir g'alati: bir “film”da u 960-golini uryapti, ikkinchisida esa uning bronza timsolini kulga aylantirishmoqchi. Har ikki syujet bitta mavzuga borib taqaladi — ulkanlikka nisbatan nafrat va abadiylikdan cho'chish.
Ronaldu ketishi nimani anglatadi? Agar bu sokin “rahmat” bilan yakunlansa, bu mutlaqo portugaliyalikka xos emas. Aksincha, stadionlar bo'ylab olqishlarga to'la tur, film, reklama va 1000 gol uchun navbatdagi katta hisob — ko'proq haqiqatga yaqin. Chunki u doim maydonda go'yo tribunalarda oddiy muxlislar emas, hakamlar hay'ati o'tirgandek o'ynagan.
Eng bahsli xulosa shuki, Ronaldu faoliyatini yakunlashdan emas, yangilik markazidan chiqib qolishdan cho'chiydi. U axborot sababini hamma narsadan yasay oladi: Pirs Morgan bilan intervyudan tortib, “Betmen” olamidagi taxminiy Joker roliga qadar.
Ronaldu “qolgan oz sonli yillarimdan zavq olmoqchiman” deya ta'kidlar ekan, dunyo bu yillar aslida nechta ekanini muhokama qilishda davom etadi. Portugaliyalik esa o'zi eng yaxshi biladigan ishni qiladi: har bir qadamini voqeaga, har bir golini dalilga, har bir “tez orada”ni esa cheksizlikka aylantiradi. Uning olamida xayrlashuv ham rekord bo'lishi shart.
Arman Tigranyants
“Zamin”ni Telegramʻda oʻqing!
