Senegal milliy jamoasi bosh murabbiyi Pap Tiav muxlislarga muhim murojaat bilan chiqdi. U Afrika Millatlar kubogi finalidagi voqealardan so‘ng unga qo‘yilgan jarimani to‘lash uchun pul yig‘ish tashabbuslarini to‘xtatishga chaqirdi.
Eslatib o‘tamiz, turnir finalida senegalliklar Marokashni 1:0 hisobida mag‘lub etib, bosh sovrinni qo‘lga kiritgandi. O‘yin davomida keskin epizodlar ham yetarlicha bo‘ldi: ikkinchi bo‘limga qo‘shib berilgan daqiqada mezbonlar yarimhimoyachisi Braim Dias 11 metrlik jarima zarbasini markazga «panenka» uslubida amalga oshirdi, biroq Senegal darvozaboni Eduar Mendi sovuqqonlik bilan to‘pni ushlab qoldi.
Shu penalti belgilanishi atrofida uzoq tortishuvlar, bahs-munozaralar kelib chiqdi. Hatto Pap Tiavning qarori bilan Senegal futbolchilari maydonni tark etishgacha borgani ham aytildi. Ya’ni final nafaqat gol, balki nervlar jangini ham eslatib qo‘ydi — o‘sha “futbolda bir qaror butun tarixni silkitadi” degan gap bor-ku, xuddi shu.
Keyin esa intizomiy qaror chiqdi. Afrika futbol konfederatsiyasining (CAF) intizomiy qo‘mitasi Pap Tiavni 5 o‘yinga diskvalifikatsiya qildi va uni «sportga xos bo‘lmagan xatti-harakatlari» uchun 100 ming dollar miqdorida jarimaga tortdi.
Muxlislar esa murabbiyni yolg‘iz qoldirmaslikka urinib, jarimani to‘lash uchun pul yig‘ish g‘oyasini o‘rtaga tashlagan. Lekin Tiav aynan shu nuqtada qattiq to‘xtaldi.
«Senegal xalqi, mening oilam! Jarima e’lon qilinganidan buyon ko‘rsatgan birdamligingiz meni juda ta’sirlantirdi… Biroq sizlardan iltimos qilamanki, mening nomimdan yoki men uchun pul yig‘ishni tashkillashtirmang… Bu mablag‘larni yanada dolzarb ehtiyojlarga, haqiqatan ham muhtoj bo‘lgan insonlar uchun yo‘naltirishingizni so‘rayman», — deya murabbiy ijtimoiy tarmoqlarda yozdi.
Qisqasi, Tiav muxlislar muhabbatini qabul qildi, lekin uni pulga aylantirishni emas — xayriyaga, yaxshilikka burishni tanladi. Muxlislar uchun esa bu ham alohida “g‘alaba”: jamoa maydonda yutdi, murabbiy esa insonlikda yutyapti.
“Zamin”ni Telegramʻda oʻqing!
