Angliya Premer-ligasining 24-turi doirasidagi London derbisida "Chelsi" "Vest Xem Yunayted"ga qarshi haqiqiy “superkambek shou” namoyish etdi. Uchrashuv dramasi shunday bo‘ldiki, bir paytlar mezbon muxlislar “bo‘ldi, ketdik” degan kayfiyatga tushib ham ulgurdi, keyin esa bari teskari aylandi.
O‘yinning boshida mehmonlar juda chaqqon harakat qildi: 7-daqiqada Jarrod Bouen hisobni ochdi. Birinchi bo‘lim oxirlarida esa Krisensio Sammervill yana bir gol urib, “bolg‘achilar”ni 2:0 hisobida oldinga olib chiqdi. Qisqasi, tanaffusga kelib "Chelsi" uchun vaziyat juda og‘ir ko‘rinayotgan edi.
Ammo ikkinchi bo‘limda maydonga boshqa "Chelsi" chiqdi — tezlik yuqori, bosim qattiq, ishonch esa maksimal. 57-daqiqada Joao Pedro raqib darvozasini ishg‘ol qilib, kambekka start berdi. Oradan ko‘p o‘tmay, 70-daqiqada Mark Kukurelya hisobni tenglashtirdi — stadion “uyg‘onib” ketdi.
Eng qizig‘i esa oxirida bo‘ldi. Uchrashuv yakuniga yaqinlashganda har ikki jamoa ham bir ochkoga rozidek ko‘rinayotgandi, lekin 90+2-daqiqada Enso Fernandes “o‘yinni o‘g‘irlab ketdi” desak ham bo‘ladi: hal qiluvchi gol — va mezbonlar uchun 3:2!
Chelsi – Vest Hem 3:2
Gollar: Joao Pedro 57, Kukurelya 70, Fernandes 90+2 – Bouen 7, Sammervill 36.
Chelsi – Sanches, Gusto (Jeyms, 81), Chaloba, Badiashvile (Fofana, 46), Xato (Kukurelya, 46), Kaysedo, Enso Fernandes, Gittens (Net-u, 26), Palmer, Garnacho (Joao Pedro, 46), Delap.
Vest Hem – Areola, Van-Bissaka, Todibo, Mavropanos, Diuf, Souchek, Sammervill, Fernandes, Bouen (Traore, 81), Pablo (Kilman, 67), Tati (Uilson, 76).
Bu g‘alaba orqali "Chelsi" ochkolarini 40 taga yetkazib, 4-pog‘onaga ko‘tarildi. "Vest Xem Yunayted" esa 20 ochko bilan 18-o‘rinda qoldi — pastki zonada havo og‘ir, bosim esa har turda oshyapti.
Xulosa oddiy: derbida 2:0 ham “xavfsiz” emas ekan. Ayniqsa, senga qarshi "Chelsi" ikkinchi bo‘limda “endi mening navbatim” rejimini yoqib yuborsa.
“Zamin”ni Telegramʻda oʻqing!
