"Arsenal" bosh murabbiyi Mikel Arteta jamoasining o‘yini tanqid qilinayotgani haqidagi gaplarga o‘z uslubida — ishonch va kinoya aralash — javob berdi. Murabbiyning aytishicha, u atrofidagi muhokamalarni boshqacha eshityapti va “tanqid” degan gap unga uncha ham mos kelmayapti.
Arteta, avvalo, “Arsenal” haqida Yevropa maydonida aytilayotgan maqtovlarga ishora qildi. Unga ko‘ra, qit’a bo‘ylab “kanonirlar”ni eng tomoshabop jamoalardan biri deb atashyapti: gollar ko‘p, natija bor, himoyada ham tartib saqlanyapti.
«Men butunlay boshqacha gaplarni eshityapman. Yevropa bo‘ylab “Arsenal”ni qit’adagi eng tomoshabop jamoa deb atashyapti — ko‘p gol uryapmiz, darvozamiz daxlsizligini saqlayapmiz. Balki mening manbalarim boshqachadir», — dedi u.
Shundan keyin jurnalistlar Britaniyadagi va xorijdagi ekspertlar fikri nega bir-biridan farq qilayotgani haqida so‘raganda, Arteta “klassika”ni ishga soldi: hazil bilan, lekin ustida qattiq ma’no bor javob qaytardi.
«Kimlar haqida gap ketayotganini bilmayman. Ismlari, manzillari va elektron pochtalarini yuboring — balki gaplashib olarmiz. Ammo men tanqid qilayotganlarning barchasi ro‘yxatini tuzib bera olmayman».
Ya’ni, murabbiyning kayfiyati shunday: “tanqid qilyapsanmi — mayli, lekin kimsan o‘zi?” degan savolni yengil kinoya bilan o‘rtaga tashladi.
Ma’lum qilinishicha, Arteta bu fikrlarni Angliya Liga Kubogi doirasidagi "Chelsi"ga qarshi javob uchrashuvi oldidan o‘tkazilgan matbuot anjumanida aytgan.
Qisqasi, Arteta “Arsenal”ni himoya qilishga kirishganda mikrofon ham “formaga kirib ketadi”. Endi esa gap maydonda: javob o‘yinida jamoa haqiqatan ham shu ishonchni natija bilan mustahkamlay oladimi — muxlislar aynan shuni kutyapti.
“Zamin”ni Telegramʻda oʻqing!
