Ispaniya Kubogi chorakfinalida «Barselona» muxlislarini biroz asabiy qildi, lekin oxirida maqsadga yetib bordi. Kataloniya klubi safarda «Albasete»ga qarshi og‘ir kechgan o‘yinda 2:1 hisobida g‘alaba qozonib, yarimfinalga chiqdi. Qisqasi: o‘yin “oson progulka” emas, haqiqiy sinov bo‘ldi.
Bahsning birinchi taymida «Barsa» o‘z uslubiga xos ravishda to‘pni nazorat qildi, ammo har bir hujum golga aylanavermadi. Shu bosim va harakatlar ichida hisobni ochgan futbolchi — Lamin Yamal bo‘ldi. U 39-daqiqada vaziyatni juda tiniq his qilib, hujumni chiroyli yakunladi va mehmonlarni oldinga olib chiqdi. Yamalning bu goli jamoaga nafaqat ustunlik, balki ruhiy ishonch ham berdi.
Ikkinchi taymda «Barselona» yana bir bor ustunligini mustahkamlashga harakat qildi. 56-daqiqada Ronald Arauxo standart vaziyatda o‘zining kuchli tomonini ko‘rsatib, hisobni 2:0 qildi. Shu lahzada ko‘pchilik “hammasi hal bo‘ldi” deb o‘ylagan, lekin futbolda “yopildi” degan gapni erta aytish — o‘zingga dushman orttirishga teng.
«Albasete» taslim bo‘lmadi. Uy jamoasi oxirigacha kurashdi va 87-daqiqada Moreno gol urib, intrigani yana tiriltirdi — 2:1. So‘nggi daqiqalarda maydondagi har bir to‘p uchun janjal, har bir duel uchun kurash ketdi. «Barsa» esa vaqtni “yoqib”, himoyada sovuqqonlik saqlab qolishga majbur bo‘ldi.
Eng qiziq epizodlardan biri — Ferran Torresning oxirgi daqiqalarda kiritgan goli hisobga olinmagani bo‘ldi. Shu qarordan keyin “endi VAR nima deydi?” degan savollar havoda aylandi, ammo hisob o‘zgarmadi. Natijada Xansi Flik boshqarayotgan jamoa kerakli natijani olib, yarimfinal ishtirokchisiga aylandi.
Qisqa ma’lumot
Ispaniya kubogi. Chorakfinal
Albasete – Barselona 1:2
Gollar: Moreno 87 – Yamal 39, Arauxo 56.
"Barselona" tarkibi: Joan Garsiya, Kanselu (Kubarsi, 46), Arauxo (Kunde, 78), Bernal (Kasado, 66), Erik Garsiya, Olmo, Jerar Martin, De Yong, Levandovski (Torres, 66), Reshford, Yamal.
Xulosa oddiy: «Barselona» qiyinchilik bilan bo‘lsa ham yo‘ldan qolmadi. Yarimfinalda esa bunday “oxirgi 5 daqiqadagi stress”ni kamroq qilish kerak, aks holda muxlislar kardiologga abonement olib qo‘yadi.
“Zamin”ni Telegramʻda oʻqing!
