“Manchester Siti” bosh murabbiyi Xosep Gvardiola maydondan tashqaridagi ijtimoiy-siyosiy masalalarga ham befarq emasligini yana bir bor ko‘rsatdi. Mutaxassis so‘nggi suhbatlaridan birida dunyodagi turli mojarolar haqida to‘xtalib, bu voqealarni “har kimga daxldor umumiy dard” sifatida ta’rifladi.
Gvardiolaning ta’kidlashicha, bugun insonzot tarixida ilk bor katta hodisalarning deyarli barchasi ko‘z o‘ngimizda — jonli, tezkor va ochiq ma’lumotlar orqali sodir bo‘lyapti. Uning fikriga ko‘ra, bu holat ba’zan odamni charchatadi, ba’zan esa qalbni og‘ritadi, lekin baribir hech kimni befarq qoldirmasligi kerak.
“Insoniyat tarixida hech qachon hozirgidek aniq ma’lumotlar bizning ko‘z o‘ngimizda bo‘lmagan. Jumladan, Falastindagi genotsid, Ukraina va Rossiyadagi voqealar, Sudandagi vaziyat — bularning barchasi ko‘z oldimizda kechyapti. Buni ko‘rishni xohlaymizmi-yo‘qmi, baribir bu hammaning muammosi”, — deya o‘z fikrini bildirgan murabbiy.
Uning aytishicha, bu kabi mavzular “kimningdir muammosi” bo‘lib qolmasligi kerak: axborot zamonida hech kim chetda tura olmaydi, chunki urush va zo‘ravonlikning soyasi baribir barchaga yetib boradi — kayfiyatga ham, inson ruhiyatiga ham, kelajakka bo‘lgan ishonchga ham.
Eslatib o‘tamiz, 2022 yil fevral oyidan beri Rossiya qurolli kuchlari Ukrainada “maxsus harbiy operatsiya” olib bormoqda. Gvardiolaning bu chiqishi esa muxlislarga tanish bir haqiqatni yana eslatdi: ba’zan futbol ham jim tura olmaydi — chunki u ham odamlar yashaydigan dunyo ichida.
“Zamin”ni Telegramʻda oʻqing!
