Angliya Premer-ligasining 25-turidagi eng katta va eng kutilgan to‘qnashuvlardan biri bugun “Enfild”da bo‘lib o‘tadi. “Liverpul” o‘z maydonida “Manchester Siti”ni qabul qiladi va bu bellashuv odatdagidek chempionlik poygasiga to‘g‘ridan to‘g‘ri ta’sir qiladigan o‘yinlardan hisoblanadi.
Toshkent vaqti bilan soat 21:30 da start oladigan bahs uchun jamoalarning asosiy tarkiblari rasman e’lon qilindi. O‘zbekistonlik muxlislar uchun eng quvonarli yangilik — mehmonlar safida milliy termamiz himoyachisi Abduqodir Husanov ilk daqiqalardanoq maydonga tushadi. Bunday o‘yinda asosiy tarkibda bo‘lish — katta ishonch, katta mas’uliyat va katta imkoniyat.
“Liverpul” esa o‘zining an’anaviy tayanch figuralari bilan maydonga chiqmoqda: himoyada Van Deyk va Konate, markazda Makallister hamda Soboslai, oldinda esa Saloh boshchiligidagi hujum chizig‘i raqib darvozasiga bosim qiladi.
“Siti” tarkibida esa Donnarumma darvozani qo‘riqlaydi, himoyada Nunes va Ait-Nuri bilan birga Abduqodir Husanov ham joy olgan. Markazda Rodri, O’Rayli va Silva o‘yin tempini ushlab turishga harakat qiladi. Oldinda esa Marmush, Semenyo va, albatta, Holand — har qanday himoya uchun “sinov rejimi”.
APL. 25-tur
Liverpul – Manchester Siti
Liverpul: Alisson, van Deyk, Konate, Kerkez, Makallister, Soboslai, Gravenberh, Gakpo, Virts, Saloh, Ekitike.
Manchester Siti: Donnarumma, Nunes, Abduqodir Husanov, Gehi, Ait-Nuri, O’Rayli, Rodri, Silva, Semenyo, Marmush, Holand.
Endi esa gap maydonda: bugungi o‘yin — katta afisha, katta bosim, katta futbol. Husanov uchun esa yana bir muhim qadam: aynan shunday kechalarda futbolchi “katta sahna”da o‘z nomini mustahkamlaydi.
“Zamin”ni Telegramʻda oʻqing!
