Londonning “Tottenhem” klubida muxlislar kutgan, ammo baribir qattiq shovqin ko‘targan qaror qabul qilindi. Rahbariyat jamoa bosh murabbiyi Tomas Frank bilan yo‘llarni rasman ajratib, uni lavozimidan ozod qildi.
O‘tgan yoz “shporlar” uchun umidli startdek ko‘ringandi: klub daniyalik mutaxassisni “Brentford”dan olib kelish uchun 12 million yevro tovon puli to‘lagan, bu esa London grandi uchun ham ancha jiddiy sarmoya hisoblanadi. Ammo natija kutilganday chiqmadi — Frankning poytaxtdagi sayohati bor-yo‘g‘i olti oy bilan cheklandi.
Sabr kosasi qaysi o‘yinda to‘ldi?
Kecha APL doirasida o‘z uyida “Nyukasl”ga qarshi kechgan bahsdagi 1:2 hisobidagi mag‘lubiyat rahbariyatning oxirgi qarorini tezlatgan asosiy omillardan biri bo‘ldi. Jamoa o‘yinida barqarorlik ko‘rinmadi, ochkolar yo‘qotilishi esa muntazam tus oldi.
Jadvaldagi holat — xavotirli signal
Ayni paytda “Tottenhem” turnir jadvalida 16-o‘ringa tushib qolgan. Eng yomoni — jamoani xavfli hududdan, ya’ni Chempionshipga tushib ketish zonasidan bor-yo‘g‘i 5 ochko ajratib turibdi. Bu degani, bir-ikki “noto‘g‘ri” tur — va vaziyat yanada og‘irlashadi.
Endi navbat Daniel Leviga
Eng katta intriga endi boshlanyapti: Daniel Levi kimni olib keladi? “Shporlar”ni bu qiyin holatdan kim chiqaradi? Klubga hozir “nom”dan ko‘ra, natija kerak — tez, sovuqqon va qattiq tartib bilan.
Qisqasi, “Tottenhem”da mavsum endi yangi ssenariyga kirdi. Muxlislarga esa bitta vazifa qoldi: nervlarni asrash va yangiliklarni diqqat bilan kuzatish.
