«Spartak» va «Dinamo»dagi o‘yinlari bilan tanilgan sobiq himoyachi Vladimir Granat Aleksandr Golovinning so‘nggi ikki uchrashuvda ketma-ket qizil kartochka olganiga munosabat bildirdi. Fransiya chempionati hamda Yevropa Chempionlar Ligasi o‘yinida yarim himoyachi maydonni muddatidan oldin tark etgandi. Bu haqda euro-football.ru xabar beradi.
Granatning fikricha, Golovin doim hissiyotga berilib ketishi mumkin bo‘lgan futbolchi. U birinchi chetlatilishida emotsiya ustun kelganini, «PSJ»ga qarshi bahsdagi epizod esa ko‘proq ehtiyotsizlik oqibatidagi fol bo‘lganini ta’kidladi. Sobiq himoyachi bunday holatda jiddiy muammo ko‘rmayotganini aytib, Golovinning “sportcha jahldor” xarakteri ijobiy sifat ekanini qo‘shimcha qildi.
Shuningdek, Granat bu voqealar Golovinning jamoadagi o‘rniga ta’sir qilmasligiga ishonch bildirdi: u jamoa yetakchilaridan biri hisoblanadi. Joriy mavsumda 29 yoshli hujumkor yarim himoyachi 26 uchrashuvda 2 gol va 5 assist qayd etgan.
“Zamin”ni Telegramʻda oʻqing!
