Dunyoning eng kuchli shaxmatchilari safida mustahkam o‘rin egallab turgan yurtdoshimiz Nodirbek Abdusattorov kuz faslidagi omadsiz turnirlardan keyin qanday qilib o‘zini qayta “topgani” haqida ochiq gapirdi. Uning aytishicha, forma — faqat kombinatsiya va debyut emas, bu avvalo ichki holat, muhit va senga ishonadigan odamlar.
— Hammasi faqat shaxmatchining o‘ziga bog‘liq emas. Atrofingdagi insonlar ham katta rol o‘ynaydi, — deydi Nodirbek.
Uning ta’kidlashicha, murabbiylar masalasida qilingan o‘zgarish o‘yiniga ijobiy ta’sir ko‘rsatgan. Rustam Qosimjonov bilan hamkorlikdan keyin yangi yo‘l tanlangan: Samarqandda bo‘lib o‘tgan Grand Sviss turniridan so‘ng Nodirbek murabbiyini o‘zgartirgan. Sabab ham bor — Qosimjonov milliy terma jamoa bosh murabbiyligiga o‘tgan, Olimpiadada jamoamiz sardori sifatida mas’uliyatli vazifani bajarishi kutilyapti.
Eng qizig‘i, endi Abdusattorov “yakka murabbiy” rejimida emas:
— Endi menda bitta emas, ikkita murabbiy bor. Lekin ularning ismini ayta olmayman, — deydi u.
Nodirbekning so‘zlaridan bilinishicha, yangi jamoa Jahon kubogidagi o‘yinlar bunchalik og‘ir chiqishini kutmagan. Ammo aynan shu davr unga muhim xulosa bergan: o‘ziga bo‘lgan munosabatni o‘zgartirish kerak ekan.
Jahon kubogidan keyin u ruhiy bosimni pasaytirib, o‘ziga boshqacha yondashuv tanlaganini aytadi:
— O‘zimga bir muddat natijaga haddan tashqari bog‘lanmaslikni aytdim. Nomzodlar turniriga chiqish imkoniyatim yo‘qolgach, shaxmatni natija uchun emas, zavq uchun o‘ynay boshladim.
Bu fikr oddiy tuyulishi mumkin, lekin sportda ko‘pincha aynan shu “o‘zingni qiynama” degan ichki buyruq sportchini qayta ochib yuboradi. Chunki haddan tashqari bosim — qo‘lni ham, miyani ham “qotirib” qo‘yadi. Nodirbek esa hozir yana o‘sha erkin, hujumkor va ishonchli uslubiga qaytganini sezdirayapti.
Muxlislar uchun eng yoqimlisi — bu hikoyada ruh tushish ham bor, lekin undan ham kuchliroq narsa bor: qayta turish. Demak, oldindagi katta turnirlarda Abdusattorovdan yanada yorqin partiyalar kutsa bo‘ladi.
“Zamin”ni Telegramʻda oʻqing!
