Portugaliya terma jamoasining sobiq futbolchisi Manishe ishtirokida o‘tgan qur’a tashlash marosimidan so‘ng UYEFA Yevropa Ligasining 1/8 final bosqichi uchun juftliklar aniq bo‘ldi. Qur’a 27-fevral kuni Shveysariyaning Non shahrida, Yevropa futboli uyida o‘tkazildi va turnirning keyingi yo‘li ham belgilab berildi.
Navbatdagi bosqichda Vengriyaning “Ferensvarosh” jamoasi Portugaliyaning “Braga”siga qarshi maydonga tushadi. Belgiyaning “Genk” klubi Germaniya vakili “Frayburg” bilan kuch sinashsa, yana bir qiziq to‘qnashuvda Germaniyaning “Shtutgart”i Portugaliya grandi “Port-u” bilan hisob-kitob qiladi.
Italiya futboli muxlislari uchun esa alohida e’tiborli juftlik yuzaga keldi: “Bolonya” va “Roma” o‘zaro to‘qnashadi. Bu o‘z-o‘ziga xos italiya derbisi bo‘lib, ushbu bahsda Seriya Aning ikki tanish raqibi Yevropa sahnasida bir-biriga qarshi chiqadi.
Gretsiyaning “Panatinaikos”i Ispaniyaning “Betis”i bilan bellashsa, Ispaniyaning “Selta”si Fransiyaning “Lion”iga qarshi maydonga tushadi. Bu juftliklar ham taktik jihatdan mazmunli va intrigaga boy o‘yinlarni va’da qilmoqda.
Angliya klublari ishtirokidagi to‘qnashuvlar ham diqqat markazida. “Nottingem Forest” Daniyaning “Mityulland” klubiga qarshi bahs olib boradi, “Aston Villa” esa Fransiyaning “Lill” jamoasi bilan kuch sinashadi. Bu ikki juftlik APL muxlislari uchun ham katta qiziqish uyg‘otishi aniq.
Qisqasi, Yevropa Ligasining 1/8 finalida nomi baland klublar, murakkab safarlar va keskin kurashlarga boy afishalar shakllandi. Endi muxlislarni yanada qiziqtiruvchi savol bitta: qaysi jamoalar bosimga chidab, chorak finalga yo‘l oladi?
1/8 finalning dastlabki o‘yinlari 12 martda, javob bahslari 19 martda o‘tkaziladi. Chorak finallar 9 va 16 aprel kunlariga belgilangan. Yarim finallar 30 aprel va 7 mayga rejalashtirilgan. Turnir finali esa 20 may kuni Istanbul shahrida bo‘lib o‘tadi.
