Angliya chempionatida fevral oyi yakunlari bo‘yicha eng yaxshi murabbiy nomi ma’lum bo‘ldi. Bu safar ushbu nufuzli sovrin Pep Gvardiolaga nasib etdi. Bu haqda rasmiy ma’lumotni Premier League matbuot xizmati e’lon qildi.
Ma’lum qilinishicha, ispaniyalik mutaxassis boshqarayotgan "Manchester City" jamoasi fevral oyida barqaror va ishonchli o‘yin namoyish qilib, birorta ham mag‘lubiyatga uchramadi. Bu esa murabbiyning taktik yondashuvi va jamoadagi yuqori darajadagi intizom samarasi sifatida baholanmoqda.
Fevral oyida “shaharliklar” uchun musobaqa oson kechgani yo‘q. Oy boshida "Tottenham Hotspur"ga qarshi bahsda durang natija qayd etildi. Biroq shundan keyin jamoa yanada ishonch bilan harakat qildi.
Keyingi turlarda "Liverpool", "Fulham", "Newcastle United" hamda "Leeds United" kabi raqiblarga qarshi o‘yinlarda g‘alaba qo‘lga kiritildi. Natijada jamoa chempionat jadvalida o‘z pozitsiyalarini yanada mustahkamladi.
Fevral oyining eng yaxshi murabbiyi sovrini uchun raqobat ham ancha kuchli bo‘ldi. Gvardioladan tashqari yana bir qator taniqli mutaxassislar — Kit Endryus («Brentford»), Maykl Kerrik («Manchester Yunayted») va Arne Slot («Liverpul») ham nomzodlar qatorida ko‘rib chiqildi.
Shunga qaramay, oy davomida ko‘rsatilgan barqaror natijalar, ketma-ket g‘alabalar va jamoaning ta’sirli o‘yini Pep Gvardiolani g‘olib sifatida tanlashga asos bo‘ldi. Muxlislar esa “Siti” bu formada davom etsa, jamoa mavsum oxirigacha chempionlik uchun jiddiy kurash olib borishiga ishonmoqda.
“Zamin”ni Telegramʻda oʻqing!
