8–15 mart kunlari Tailandning Bangkok shahri yosh sportchilar o‘rtasida xalqaro “Futures Cup” turniriga mezbonlik qildi. Ushbu nufuzli musobaqada ishtirok etgan O‘zbekiston terma jamoasi a’zolari ajoyib natijalar ko‘rsatib, 4 ta oltin, 5 kumush va 2 ta bronza medalini qo‘lga kiritishdi. Bu esa ularga musobaqa yakunida “eng yaxshi jamoa” maqomiga erishish imkonini taqdim qildi.
Jamoa a’zolari og‘ir bellashuvlarda o‘z mahorat va iste’dodini namoyish etib, har bir bahsda faol harakat qilishdi. Oltin medalni qo‘lga kiritgan sportchilar qatorida -85 kg vazn toifasida Sardorbek Bahromxo‘jayev, -90 kg Asadbek Sultonboyev, +90 kg Islom Salixov va -60 kg Rushanabonu Isoyeva bor edi. Shuningdek, kumush medallar Suxrob Rahmatullayev (-75 kg), Nazokat Mardonova (-51 kg), Sevara Mamatova (-65 kg), Samira Turg‘unova (-75 kg) va Asaloy Baxtiyorova (-80 kg)ga nasib bo‘ldi. Bronza medallar esa Abdug‘ani Yorqinjonov (-50 kg) va Nilufarxon Abduhoshimova (+80 kg) hisobiga yozildi.
Murabbiylar guruhi – Xulio Li Echavarria, Sirojiddin Nayimov, Baxtiyor To‘raboyev, Elnur Abduraimov, Temur Axbayev, Eldor Holmatov, Mirxon Sodiqov va Shahobbek Jo‘rayev – sportchilarni har jihatdan tayyorlab, ularning eng yuqori natija ko‘rsatishiga hissa qo‘shdi. Jamoa menejeri Mirzohid Numonov hamda hakam Maruf Urdushev o‘z vazifalarini mukammal bajardi.
O‘zbekiston yoshlari shu natijalar bilan umumjamoa hisobida birinchi o‘rinni egalladi. Qozog‘istonga ikkinchi o‘rin, uchinchi o‘rin esa AQSH sportchilariga nasib etdi. Mutaxassislar fikriga ko‘ra, bu natija yurtimiz boksining yosh avlod uchun qanchalik rivojlanayotganidan dalolat beradi hamda kelgusi xalqaro musobaqalarda yanada ko‘proq yutuqlarga erishish imkoniyatini ochib beradi.
“Zamin”ni Telegramʻda oʻqing!
