O‘zbekiston milliy terma jamoamiz navbatdagi xalqaro musobaqa uchun yig‘in o‘tkazmoqda. Bugungi mashg‘ulotlar oldidan jamoa a’zosi Sherzodbek Temirov jurnalistlar savollariga ochiq va samimiy javob berdi.
Temirov Katanetsdan keyin Fabio Kannavaro davrida ilk bor yig‘inga chaqirilgani haqida shunday dedi: "Allohga shukur, uzoq muddatdan keyin yana milliy terma safida maydonga tushish imkoniyati paydo bo‘ldi. Xudo xohlasa, Jahon chempionati oldidan o‘zimizning eng yaxshi sifatlarimizni ko‘rsatishga harakat qilamiz".
Iroq chempionatidagi natijalari haqida so‘ralganda u fikr bildirdi: "2-davra boshlandi, oldimizda yana 12-13 ta tur bor. U yerda raqobat yuqori, ko‘plab futbolchilar to‘purarlar jadvalida ortimizdan kelyapti. Mavsum tugamasdan avval hech narsa haqida aniq fikr aytish qiyin".
Opta reytinglari va Iroq ligasining darajasi haqida gapirib: "Iroq ligasini jurnalistlar bizdan ham yaxshiroq baholashadi. Haqiqiy baho berish esa biz uchun emas", – dedi Temirov.
Gonkong chempionatidagi faoliyati va terma jamoadan chaqiruv haqida u shunday fikr bildirdi: "Ba’zi odamlar Gonkong ligasini past darajada deb baholashadi. Ammo u yerda ham argentinalik, braziliyalik va boshqa legionerlar ko‘p. Murabbiyning qarorini men o‘zgartirolmayman. Men o‘z vazifamni bajarib, terma jamoaga qo‘ldan kelgancha yordam berishga harakat qilaman".
Yozda Superliga klublaridan takliflar kelishi mumkinligi haqida: "Hozir oldimizda bir qator takliflar bor. Menejerim bilan hali gaplashmadim, u hozir Niderlandiyada. Kelgandan so‘ng gaplashib ko‘ramiz", – deb javob berdi futbolchi.
Ma’lumot uchun, 27 yoshli forvard Iroqning «Erbil» klubida o‘ynaydi. U bu mavsumda 14 ta bahsda 20 ta gol urib, to‘purar bo‘lib turibdi va eng yaqin ta’qibchisini 7 ta golga ortda qoldirmoqda.
Eslatib o‘tamiz, O‘zbekiston FIFA Series xalqaro o‘rtoqlik turniri doirasida 27 mart kuni Gabon, 30 mart sanasida Venesuela bilan o‘ynaydi.
Bu yig‘inga chaqiruv Sherzodbek Temirov uchun katta ilhom va milliy terma safidagi yangi imkoniyatlar eshigini ochdi, muxlislar uning maydondagi harakatlarini intizorlik bilan kutayotganini ham ta’kidladi.
“Zamin”ni Telegramʻda oʻqing!
