Seriya A bosh direktori Luiji De Siyervo Italiyadagi eskirgan futbol infratuzilmasi haqida ochiq va keskin fikr bildirdi. Uning ta’kidlashicha, mamlakatdagi stadionlar Yevropadagi eng qadimiylar qatorida va ularning o‘rtacha yoshi 70 yildan oshgan. Bu holat Italiya futbolining rivojlanishiga to‘siq bo‘lmoqda.
De Siyervo yangi iqtisodiy modelni joriy etish orqali vaziyatning o‘zgarishini kutmoqda, biroq bu tizim kamida 6–7 yildan keyingina to‘liq samarali ishlaydi. Shu vaqtgacha Italiya ligasi va Yevropa bo‘yicha boshqa chempionatlar bilan raqobatdagi farq faqat kengayib boradi.
2032 yilgi Yevropa chempionati Italiya uchun oxirgi imkoniyat sanaladi. Hozirda Milanda 1 milliard yevrodan ortiq investitsiya bilan yangi stadionlar qurilishi rejalashtirilmoqda, shuningdek, "Latsio" va "Roma"ning muhim infratuzilma loyihalari ham amalga oshirilyapti. Genuya va Florensiyada stadionlarni modernizatsiya qilish bo‘yicha ham ishlar olib borilmoqda.
Eslatib o‘tamiz, Italiya va Turkiya Yevro-2032 musobaqasi mezbonlari sifatida belgilangan. Bu esa mamlakat uchun futbol infratuzilmasini modernizatsiya qilishni taqozo qiladigan muhim signaldir.
“Zamin”ni Telegramʻda oʻqing!
