Osiyo Chempionlar Ligasi-2 musobaqasining G‘arb mintaqasida navbatdagi yarimfinalchi nomi aniq bo‘ldi. BAA hududida markazlashtirilgan tarzda o‘tayotgan chorakfinal bosqichi so‘nggi uchrashuvi ham katta kurash va intrigaga boy kechdi.
Qatarning «Al Ahli Doha» jamoasi Iordaniyaning «Al Husayn» klubiga qarshi maydonga tushib, ishonchli 3:1 hisobida g‘alaba qozondi va yarimfinal yo‘llanmasini qo‘lga kiritdi.
Uchrashuv davomida «Al Ahli» futbolchilari o‘yinni to‘liq nazorat qilib bordi va imkoniyatlardan samarali foydalanib, ustunlikni saqlab qoldi. Jamoa tezkor gollar va taktik barqarorlik hisobiga muhim g‘alabaga erishdi.
Gollarga to‘xtalsak, Eksposito 2-daqiqada to‘p kiritib, uchrashuvning asosiy qahramonlaridan biriga aylandi. Julian Draksler 65-daqiqada hisobni oshirgan bo‘lsa, Vlap 90+7-daqiqada penaltidan aniq harakat qilib, g‘alabani mustahkamladi. Iordaniya jamoasi safida Qashi 21-daqiqada yagona javob golini urdi.
OCHL-2. Chorakfinal
Al Ahli Doha (Qatar) — Al Husayn (Iordaniya) 3:1
19 aprel, Dubay.
Gollar: Eksposito (2), Draksler (65), Vlap (90+7, penalti) — Qashi (21).
Endi «Al Ahli Doha» uchun eng jiddiy sinov oldinda. Jamoa yarimfinalda Saudiya Arabistonining «Al Nasr» klubiga qarshi maydonga tushadi. Bu jamoa safida jahon futboli yulduzi Krishtianu Ronaldu to‘p surayotgani bahsni yana-da qiziqarli qiladi.
22 aprel kuni bo‘lib o‘tadigan ushbu o‘yin g‘olibi finalga yo‘l oladi va Sharq mintaqasidan chiqqan Yaponiyaning «Gamba Osaka» jamoasiga qarshi turnir bosh sovrini uchun kurash olib boradi.
Qisqasi, musobaqa hozir eng qizg‘in pallaga kirdi. Endi har bir hatto kichik xato ham final yo‘lini hal qilishi mumkin. Muxlislarni esa yana-da dramatik va keskin uchrashuvlar kutib turibdi.
“Zamin”ni Telegramʻda oʻqing!
