Xalqaro siyosat va futbol yana bir bor qiziq tarzda uygʻunlashdi. Luis Inasiu Lula da Silva Portugaliya bosh vaziri Luish Montenegru bilan uchrashuv chogʻida 2026 yilgi jahon chempionati haqida hazilomuz fikrlar bildirdi.
Braziliya yetakchisi suhbat davomida tarixiy xotiralarga murojaat qilib, 1966 yilgi mundialni esladi. U paytda Eysebio yetakchiligidagi Portugaliya terma jamoasi Pele boshchiligidagi Braziliyani musobaqadan chiqarib yuborgan edi. Lula bu voqeani yumor bilan tilga olib, yangi chempionatda boshqacha ssenariy boʻlishini istashini bildirdi.
«Umid qilamanki, 2026 yilda Portugaliya bizning doʻstona munosabatlarimizni inobatga oladi va Krishtianu Ronaldu hamda uning jamoadoshlari Vinisius Junior boshchiligidagi Braziliya terma jamoasini magʻlub eta olmaydi», — deya kuldi prezident.
Oʻz navbatida, Luish Montenegru ham suhbatga yumor bilan yondashib, ehtimoliy final haqida gap ochdi: «Biz buni finalda amalga oshirishimiz mumkin».
Bu javobdan keyin Lula yana hazilni davom ettirib, bunday ssenariy ikki mamlakat oʻrtasida “toʻxtatib boʻlmas raqobat”ga sabab boʻlishi mumkinligini taʼkidladi.
Qisqacha aytganda, futbol nafaqat sport, balki diplomatik muloqotda ham iliq va samimiy muhit yaratishga xizmat qilmoqda. 2026 yilgi jahon chempionati esa shunday qiziq “duellar” uchun yana bir sahnaga aylanishi kutilmoqda.
“Zamin”ni Telegramʻda oʻqing!
