"Manchester Yunayted" sardori Bruno Fernandes Saudiya Arabistoni Pro-ligasidan tushgan serdaromad taklifni nima sababdan rad etganini ochiqladi. Portugaliyalik pleymeyker kelajagi borasidagi ko'plab mish-mishlarga qaramay, "Old Trafford"da qolib, o'zining professional faoliyatini davom ettirishni ma'qul ko'rgan. Bu haqda Goal.com xabar beradi.
Fernandes Yaqin Sharq klublarining asosiy nishonlaridan biri bo'lib kelayotgan edi. Biroq 31 yoshli futbolchi moliyaviy jihatdan juda katta mablag'lardan voz kechib, jamoada qolishni tanladi. U vaqtinchalik bosh murabbiy Maykl Kerrik qo'l ostida ajoyib o'yin ko'rsatmoqda. Sardor jamoasining turnir jadvalida uchinchi o'ringa ko'tarilishiga katta hissa qo'shdi va joriy mavsumda 8 ta gol hamda 19 ta golli uzatmani amalga oshirdi.
BBC Sport telekanalidagi Ueyn Runi shousida ishtirok etgan yarim himoyachi o'z qarorini yuqori maosh emas, balki sportdagi maqsadlari bilan izohladi. Uning so'zlariga ko'ra, oilaviy qadriyatlar boylikdan ko'ra professional muvaffaqiyat va farzandlarining baxtini ustun qo'yishga undagan.
Fernandes rafiqasi bilan bo'lgan suhbat haqida shunday dedi: «Men klubga hali beradigan narsam bor deb o'ylaganim uchun qoldim. Saudiya varianti va pullar... bu juda ko'p edi. Oilamning yaxshi tomoni shundaki, rafiqam ham men kabi hayotga real qaraydi. Biz dunyodagi eng boy odam bo'lishni istamaymiz. Biz shunchaki o'z orzularimizga erishgan va farzandlarimiz bilan baxtli yashaydigan insonlar bo'lishni xohlaymiz».
Rafiqasining «Sen barcha orzularingga erishdingmi?» degan savoli futbolchi uchun burilish nuqtasi bo'ldi. Bu suhbat uning Angliya klubidagi faoliyati hali yakunlanmaganini anglashiga yordam berdi. Endilikda "Manchester Yunayted" dushanba kuni "Brentford"ni qabul qiladi va g'alaba qozonsa, keyingi mavsum uchun Chempionlar ligasi yo'llanmasini deyarli naqd qiladi.
“Zamin”ni Telegramʻda oʻqing!
