«Bavariya» 0:3 hisobidagi mag'lubiyatni g'alabaga aylantirib, «Mayns»ni mag'lub etdi
"Bavariya" Germaniya Bundesligasida "Mayns"ga qarshi kechgan bahsda 0:3 hisobidagi mag'lubiyatni 4:3 hisobidagi irodali g'alabaga aylantirdi. Birinchi bo'limda uchta gol o'tkazib yuborgan myunxenliklar ikkinchi bo'limda Jekson, Olise, Musiala va Kanening gollari evaziga aqlbovar qilmas "kambek"ni amalga oshirishdi. Ushbu natija klub uchun 1980-yildan buyon ilk bor tanaffusdagi yirik mag'lubiyatdan so'ng qozonilgan tarixiy g'alaba bo'ldi. Hal qiluvchi gol muallifi Harri Kane mavsumdagi 53-golini urib, jamoasining YeCHL yarim finali oldidan ruhiy ishonchini yanada mustahkamladi.
Germaniya Bundesligasining navbatdagi turida «Bavariya» safarda «Mayns» ustidan 4:3 hisobida irodali g'alabaga erishdi. Myunxenliklar uchrashuvning birinchi bo'limida o'z darvozalaridan uchta to'p olib chiqishdi. Dominik Kor, Paul Nebel va Sheraldo Bekkerning gollari mezbonlarni tanaffusga qadar yirik hisobda oldinga olib chiqdi. Bu haqda Goal.com xabar beradi.
Ikkinchi bo'limda Vinsent Kompani shogirdlari o'yin tizginini butunlay o'zgartirishdi. Nikolas Jekson, Maykl Olis va Jamal Mussiala tomonidan kiritilgan gollar hisobni tenglashtirdi. Uchrashuvning 83-daqiqasida zaxiradan maydonga tushgan Harri Kane g'alaba to'pini kiritdi. Bu gol angliyalik hujumchi uchun joriy mavsumdagi barcha musobaqalarda urilgan 53-gol bo'ldi.
Ushbu natija Bundesliga tarixidagi noyob voqelikka aylandi. «Bavariya» 1980-yildan buyon ilk bor tanaffusda 0:3 hisobida ortda qolayotgan o'yinda g'alaba qozonishga muvaffaq bo'ldi. Harri Kane tanaffusda jamoa ichida jiddiy suhbat bo'lganini va futbolchilar maydonga o'zgacha shijoat bilan qaytishganini ta'kidladi.
Bosh murabbiy Vinsent Kompani jamoasining ruhiy holatini yuqori baholadi. Uning so'zlariga ko'ra, bunday g'alabalar Chempionlar ligasi yarim finalida «PSJ»ga qarshi bo'ladigan muhim bahs oldidan jamoaga qo'shimcha ishonch bag'ishlaydi. Kane esa Robert Levandovskining 2019-2020-yillardagi natijasiga yaqinlashib, Yevropaning kuchli beshlik ligalarida eng sermahsul futbolchi bo'lib turibdi.
Izohlar 0
…