Chempionlar ligasi g‘olibi Uesli Sneyder Arsenal va Atletiko Madrid o‘rtasidagi yarim final javob uchrashuvi sifatidan norozi bo‘lib, UEFA o‘yinni birinchi bo‘limdayoq to‘xtatishi kerak edi, deb hisoblaydi. Bukayo Saka tomonidan kiritilgan yagona gol londonliklarga final yo‘llanmasini taqdim etgan bo‘lsa-da, niderlandiyalik afsona maydondagi futbol darajasi bunday nufuzli bosqich uchun juda past bo‘lganini ta’kidladi. Bu haqda Goal.com xabar beradi.
Ziggo Sport efirida gapirgan Sneyder: "35-daqiqadayoq UEFA aralashishi kerak edi, deb aytdim. Ular Londonga qo‘ng‘iroq qilib, har ikki jamoani maydondan chiqarib yuborishi va ertasi kuni Bavariya hamda PSJ o‘rtasida final o‘tkazilishi lozim edi", deya keskin fikr bildirdi. Uning so‘zlariga ko‘ra, Atletiko Madrid himoyaga yotib olgani, Arsenal esa to‘p nazoratini o‘z qo‘lida ushlab turgani tomoshaboplikni pasaytirgan.
Sneyder Mikel Artetaning murabbiylik mahoratini e’tirof etgan holda, Arsenal tarkibida haqiqiy yulduz futbolchilar yo‘qligini urg‘uladi. "Arteta haykalga loyiq, chunki u tarkibida birorta ham top-darajadagi futbolchi bo‘lmasdan turib, Atletiko Madrid kabi jamoani bosim ostida ushlab tura oldi", deya qo‘shimcha qildi sobiq yarim himoyachi.
O‘z navbatida, Atletiko Madrid bosh murabbiyi Diyego Simeone mag‘lubiyatni munosib qabul qildi. U bahsli vaziyatlarga qaramay, bahonalar qidirmadi va raqibning finalga chiqishga haqli ekanini tan oldi. Simeone o‘z shogirdlarining bor kuchini ishga solganidan faxrlanishini va jamoa mavsum davomida munosib kurash olib borganini qayd etdi.
“Zamin”ni Telegramʻda oʻqing!
