Frank Lampard murabbiylik faoliyatidagi eng katta yutuqlaridan biriga erishib, Koventri Siti jamoasini 25 yillik tanaffusdan so‘ng Angliya Premer-ligasiga qaytardi. Jamoa bilan chempionat g‘olibi bo‘lgan mutaxassis 95 ochko jamg‘arib, muxlislar mehrini qozondi. Biroq, muvaffaqiyatli mavsumga qaramay, uning kelajagi borasida mish-mishlar ko‘paymoqda. Bu haqda Goal.com xabar beradi.
Taniqli sharhlovchi Richard Keysning fikricha, Lampard yangi mavsum boshlanishidan oldin Koventri Sitini tark etishi mumkin. Ko‘pchilik uni Chelsi jamoasiga qaytishini kutayotgan bo‘lsa-da, Keys boshqa bir London klubi — Fulxem variantini asosiy nomzod sifatida ko‘rsatmoqda.
Bu mish-mishlar Fulxem bosh murabbiyi Marko Silvaning shartnomasi yakunlanayotgani bilan bog‘liq. Agar Silva jamoani tark etsa, klub rahbariyati Lampardni asosiy nomzod sifatida ko‘rib chiqishi kutilmoqda. Lampardning Koventri Siti bilan shartnomasi yana bir yilga mo‘ljallangan va tomonlar hali yangi kelishuvga erishmagan.
Richard Keys klub egasi Doug Kingning Premer-ligadagi ambitsiyalari va moliyaviy imkoniyatlari Lampardning qolish-qolmasligini hal qiluvchi omil bo‘lishini ta’kidladi. Murabbiyning o‘zi esa hozirgi vaqtda faqat Koventri Siti bilan erishgan chempionlik bayramiga e’tibor qaratayotganini va boshqa klublar haqidagi gap-so‘zlarga izoh bermasligini ma’lum qildi.
“Zamin”ni Telegramʻda oʻqing!
