Manchester Yunayted afsonasi Pol Skoulz Mikel Arteta boshqaruvidagi Arsenal jamoasini keskin tanqid ostiga oldi. U jamoaning Angliya Premer-ligasi va Chempionlar ligasida g‘oliblik uchun kurashayotganiga qaramay, ularning o‘yin uslubini "zerikarli" deb baholadi. Bu haqda Goal.com xabar beradi.
Arsenal 2004-yildan buyon ilk bor chempionlikka yaqin turibdi va Chempionlar ligasi finalida PSJga qarshi maydonga tushishga tayyorlanmoqda. Shunga qaramay, Skoulz bu jamoani tarixiy buyuk jamoalar qatoriga qo‘shishga shoshilmayapti. Uning fikricha, jamoa o‘yinida muxlislarni hayratga soladigan ijodkorlik yetishmaydi.
"The Overlap" podkastida so‘zga chiqqan sobiq yarim himoyachi, jamoaning himoyaga asoslangan va nazoratli o‘yin uslubi unga yoqmasligini ta’kidladi. Skoulz ayniqsa, darvozabon David Raya va markaziy himoyachilar o‘rtasidagi uzoq davom etadigan pas almashinuvlarini zerikarli deb hisoblaydi.
Shuningdek, Skoulz Arsenalning asosiy raqobatchilari — Manchester Siti va Liverpulga qarshi o‘yinlardagi natijalarini eslatib o‘tdi. Uning so‘zlariga ko‘ra, haqiqiy buyuk jamoa bo‘lish uchun aynan kuchli raqiblarga qarshi o‘yinlarda g‘alaba qozonish shart, biroq Arsenal bu borada oqsayapti.
“Zamin”ni Telegramʻda oʻqing!
