Sky xabariga koʻra, Babak Keyhanfar Bavariya U23 jamoasining yangi bosh murabbiyi Dante bilan birga ish boshlaydi. 41 yoshli mutaxassis yordamchi murabbiy sifatida katta tajribaga ega boʻlib, u bilan 2028-yilgacha moʻljallangan shartnoma imzolanishi kutilmoqda. Bu haqda Goal.com xabar beradi.
Keyhanfar oʻz faoliyati davomida Maynts 05, Union Berlin va Red Bull Zalsburg kabi klublarda ishlagan. Shuningdek, u tajribali murabbiy Yurgen Klopp bilan hamkorlik qilgan va murabbiylik sohasida boy bilim toʻplagan. U 2024-yil oxiridan buyon ishsiz edi.
Braziliyalik himoyachi Dante yozda Bavariya U23 jamoasini qabul qilib oladi va murabbiylik faoliyatini aynan shu yerda boshlaydi. Hozirda 42 yoshli futbolchi Liga 1 vakili OGC Nice safida oʻz oʻyinlarini davom ettirmoqda.
Dante 2012-2015-yillar oraligʻida Bavariya safida 133 ta oʻyinda maydonga tushgan. U Myunxen klubi bilan uch marta Bundesliga, uch marta DFB-Pokal va bir marta Chempionlar ligasi gʻolibi boʻlishga erishgan.
“Zamin”ni Telegramʻda oʻqing!
