Sky xabariga koʻra, Babak Keyhanfar Bavariya yoshlar jamoasining yangi bosh murabbiyi Dante uchun yordamchi boʻladi. 41 yoshli mutaxassis yordamchi murabbiy sifatida katta tajribaga ega boʻlib, u bungacha Maynts 05 va Union Berlin klublarida faoliyat yuritgan. U Bavariya bilan 2028-yilga qadar moʻljallangan shartnoma imzolash arafasida turibdi. Bu haqda Goal.com xabar beradi.
Keyhanfar oʻz murabbiylik faoliyatini futbolchilik davridayoq boshlagan. U avvalroq Red Bull Zalsburgning zaxira jamoasi boʻlgan FC Liefering, shuningdek, Bo Svensson qoʻl ostida Maynts va Union Berlin klublarida ishlagan. Tajribali murabbiy hatto Yurgen Klopp bilan ham yaqindan hamkorlik qilgan.
Braziliyalik Dante yozda Bavariyaning U23 jamoasini qabul qilib oladi va shu tariqa murabbiylik faoliyatini boshlaydi. 42 yoshli himoyachi hozirda Liga 1 vakili OGC Nice safida oʻynashda davom etmoqda. Dante 2012-2015-yillar oraligʻida Bavariya tarkibida 133 ta oʻyin oʻtkazib, Bundesligada uch marta, DFB-Pokal musobaqasida uch marta va Chempionlar ligasida bir marta gʻolib chiqqan.
Dante bu lavozimda 2020-yildan buyon jamoani boshqarib kelgan Xolger Zaytsning oʻrnini egallaydi. Zayts jamoani 2018/19-yilgi mavsumda Regionalliga chempioni qilgan edi. Endilikda u klub tizimida boshqa lavozimda faoliyatini davom ettiradi.
“Zamin”ni Telegramʻda oʻqing!
