Bavariya yarim himoyachisi Joao Palhinha faoliyatini Portugaliyada davom ettirishi mumkin. "Correio da Manha" radiosi rahbari Pedro Sousa xabariga ko‘ra, Lissabonning ikki grandi — Sporting va Benfika futbolchini o‘z safiga qo‘shib olishdan manfaatdor. Bu haqda Goal.com xabar beradi.
Ma’lum bo‘lishicha, 30 yoshli futbolchi farzandlariga yaqinroq bo‘lish uchun vataniga qaytishni istamoqda. Uning uchun Sportingga qaytish "asosiy ustuvorlik" hisoblanadi, Benfika esa transfer bo‘yicha dastlabki so‘rovlarni yuborib ulgurgan.
Ayni damda Palhinha ijara asosida Tottenxem sharafini himoya qilmoqda. U 2024-yilda 51 million yevro evaziga Bavariya safiga o‘tgan edi, biroq Vincent Kompany qo‘l ostida asosiy tarkibdan joy topa olmadi. Natijada futbolchi London klubiga ijaraga berildi.
Tottenxem futbolchini 25 million yevro evaziga to‘liq sotib olish huquqiga ega, biroq klub rahbariyati ushbu shartni qayta ko‘rib chiqmoqchi. Bavariya sport direktori Christoph Freund vaziyat noaniq ekanligini ta’kidlab, yakuniy qaror mavsum yakunida qabul qilinishini ma’lum qildi.
“Zamin”ni Telegramʻda oʻqing!
