Bavariya yarim himoyachisi Konrad Laimer bilan shartnomani uzaytirish borasidagi muzokaralar jiddiy toʻsiqqa duch keldi. Myunxen klubi sport direktori Maks Eberl tomonlar oʻrtasidagi moliyaviy qarashlar mos kelmayotganini va kelishuv jarayoni hozircha toʻxtab qolganini tan oldi. Bu haqda Goal.com xabar beradi.
Avstriyalik futbolchi jamoaning muhim boʻgʻinlaridan biri hisoblanadi, biroq uning maosh borasidagi talablari klub rahbariyatini qoniqtirmayapti. Xabarlarga koʻra, Laimer yillik maoshini 15 million yevrogacha oshirishni istamoqda, Bavariya esa bunday katta xarajatlarga tayyor emas.
Klubning faxriy prezidenti Uli Xyones vaziyatga keskin munosabat bildirib, hech bir futbolchi klubning moliyaviy tizimidan ustun emasligini taʼkidladi. U Laimerning mehnatkashligini yuqori baholasa-da, futbolchi Maradona emasligini va maosh borasida belgilangan limitlarga rioya qilishi kerakligini eslatib oʻtdi.
Maks Eberl esa muzokaralar professional ruhda davom etayotganini va tomonlar oʻrtasida hech qanday kelishmovchilik yoʻqligini qoʻshimcha qildi. Hozirgi vazifasi — futbolchining talablari va klubning imkoniyatlari oʻrtasidagi tafovutni bartaraf etishdan iborat.
“Zamin”ni Telegramʻda oʻqing!
