“Benfika” bosh murabbiyi Joze Mourinyu o‘z murabbiylik faoliyati davomida qabul qilgan eng qiyin qarori haqida gapirdi. Portugaliyalik mashhur mutaxassis bu savolga javob berar ekan, faoliyatidagi eng og‘ir tanlov “Inter” klubini tark etish bo‘lganini ta’kidladi.
Mourinyu futbol olamida o‘zining keskin xarakteri, katta g‘alabalarga bo‘lgan ishtiyoqi va har qanday jamoaga g‘oliblik ruhini olib kira olishi bilan tanilgan. Ammo hatto u kabi tajribali murabbiy uchun ham ayrim qarorlar oson qabul qilinmagan.
Undan “Murabbiy sifatida qabul qilgan eng qiyin qaroringiz qaysi?” deb so‘rashganida, Mourinyu qisqa va aniq javob berdi:
— “Inter”dan ketish.
Portugaliyalik mutaxassisdan bugun ham o‘sha qarorni qabul qilgan bo‘larmidingiz, deb so‘ralganda, u ikkilanmasdan “ha” deb javob berdi. Uning aytishicha, o‘sha paytda “Inter” bilan tarixiy mavsumni o‘tkazgan, jamoa Italiya chempionligi, Italiya kubogi va Chempionlar ligasida g‘alaba qozongan edi.
— Ha, chunki men o‘shanda “Inter” bilan o‘sha mavsumning o‘zida Skudetto va Italiya kubogini qo‘lga kiritib, ketidan Chempionlar ligasida ham zafar quchgan edim. Tan olish kerak, juda qiyin bo‘lgan, ammo keyin Madridning “Real” klubiga o‘tganman, — deya Mourinyuning so‘zlarini keltiradi La Gazzetta dello Sport.
“Inter”dagi davr Mourinio faoliyatining eng yorqin sahifalaridan biri hisoblanadi. U Milan klubini nafaqat Italiyada, balki Yevropa maydonida ham yuqori cho‘qqiga olib chiqdi. Ayniqsa, Chempionlar ligasidagi g‘alaba “neradzurri” muxlislari xotirasida abadiy saqlanib qolgan.
Ma’lumot uchun, Mourinyu boshqaruvida “Inter” ikki bor Italiya A Seriyasida g‘olib chiqqan. Shuningdek, jamoa Chempionlar ligasi, Italiya kubogi va Italiya Superkubogida ham zafar quchgan. Bu natijalar portugaliyalik mutaxassisning “Inter” tarixidagi o‘rnini yanada mustahkamladi.
Biroq katta g‘alabalardan keyin ham Mourinyu yangi chaqiriqni tanladi va Madridning “Real” klubiga yo‘l oldi. Bu qaror professional nuqtayi nazardan tushunarli bo‘lsa-da, hissiy jihatdan oson bo‘lmagani uning so‘zlaridan ham bilinib turibdi.
Futbolda ba’zan ketish ham g‘alaba kabi og‘ir bo‘ladi. Ayniqsa, sen jamoani tarixiy cho‘qqiga olib chiqqan bo‘lsang. Mourinyu uchun “Inter”dan ketish aynan shunday qaror bo‘lgan: yurak bir narsa deydi, karyera esa boshqa yo‘lni ko‘rsatadi.
“Zamin”ni Telegramʻda oʻqing!
