Argentina terma jamoasi bosh murabbiyi Lionel Scaloni 2026-yilgi jahon chempionati uchun 55 nafar futbolchidan iborat dastlabki kengaytirilgan tarkibni e’lon qildi. Ro‘yxatdan afsonaviy sardor Lionel Messi o‘rin olgan bo‘lib, u o‘z faoliyatidagi so‘nggi mundialga tayyorgarlik ko‘rmoqda. Bu haqda Goal.com xabar beradi.
Tarkibda Qatar-2022 g‘oliblari bilan bir qatorda Angliya Premer-ligasida to‘p surayotgan yulduzlar, jumladan, Manchester Yunayted himoyachisi Lisandro Martinez va Chelsi yarim himoyachisi Enzo Fernandez ham bor. Shuningdek, Alejandro Garnacho kabi yosh iqtidor egalari ham murabbiy ishonchini qozonishgan.
Biroq, e’lon qilingan ro‘yxat kutilmagan qarorlarga ham boy bo‘ldi. 40 ta o‘yinda maydonga tushgan Roma yulduzi Paulo Dybala hamda Atletiko Madrid sobiq hujumchisi Angel Correa tarkibdan chetda qoldi. Bu holat Scalonining taktik o‘zgarishlarga qo‘l urganidan dalolat beradi.
Murabbiy shtabi Dybala o‘rniga Parma vakili Mateo Pellegrino va Roma futbolchisi Matias Souleni tanlagan. Hozirda e’lon qilingan 55 nafar futbolchi orasidan yakuniy 26 kishilik ro‘yxat 30-may sanasiga qadar shakllantirilishi kerak.
“Zamin”ni Telegramʻda oʻqing!
