RB Leyptsig iqtidorli hujumchisi Yan Diomande atrofidagi transfer mish-mishlari tobora kuchaymoqda. Uzoq vaqt davomida futbolchiga Bavariya va Liverpul qiziqish bildirayotgani haqida xabarlar tarqalgan bo‘lsa-da, 19 yoshli ivuarlik futbolchining o‘zi boshqa nomlarni tilga oldi. Bu haqda Goal.com xabar beradi.
Matbuot anjumanida so‘zga chiqqan Diomande: "Tasavvur qiling, odamlar sizni Chelsi yoki Real Madrid safiga o‘tishingizni aytishmoqda. Bu har qanday futbolchini xursand qiladi va yanada ko‘proq motivatsiya beradi", — deya ta’kidladi. Yosh yulduz o‘ziga bildirilayotgan e’tibordan mamnun ekanligini yashirmadi.
O‘tgan yozda CD Leganes klubidan 20 million yevro evaziga xarid qilingan Diomande joriy mavsumda 35 ta o‘yinda 13 ta gol urib, 9 ta golli uzatmani amalga oshirdi. Ushbu statistik ko‘rsatkichlar PSJ va Manchester Siti kabi grand klublarning ham e’tiborini tortdi.
RB Leyptsig rahbariyati esa o‘z yulduzini sotish niyatida emas. Klub vakili Oliver Mintzlaff agar sport direktori bo‘lganida, qancha taklif bo‘lishidan qat’i nazar, bu yosh futbolchini qo‘yib yubormasligini ma’lum qildi. Bavariya esa transfer narxi 100 million yevrodan oshib ketishi mumkinligi sababli, muqobil variant sifatida Entoni Gordon nomzodiga to‘xtaldi.
“Zamin”ni Telegramʻda oʻqing!
