Braziliyalik iqtidorli hujumchi Endrickning Fransiyadagi qisqa, ammo yorqin faoliyati oʻz yakuniga yetdi. Lion klubi rahbariyati 19 yoshli futbolchi ijara muddati tugagach, oʻzining asosiy klubi Real Madrid safiga qaytishini rasman tasdiqladi. Bu haqda Goal.com xabar beradi.
Lion klubi seleksiya boʻlimi boshligʻi Matthieu Louis-Jean futbolchining jamoaga qoʻshgan hissasini yuqori baholadi. Besh oy davomida Endrick barcha musobaqalarda 21 ta oʻyinda maydonga tushib, 8 ta gol va 8 ta golli uzatmaga mualliflik qildi. Uning fransuz tilini qisqa vaqt ichida oʻrganib olgani va jamoaga tez moslashgani murabbiylar shtabini hayratda qoldirdi.
Garchi Lion rahbariyati iqtidorli hujumchini jamoada olib qolishni istasa-da, moliyaviy va shartnomaviy shartlar bunga imkon bermaydi. Endrickning oʻzi ham Fransiyadagi davrini iliq xotiralar bilan eslab, kelajagini taqdirga topshirganini va Real Madridga qaytishga tayyorligini taʼkidladi.
Mavsumning soʻnggi uchrashuvida Lion muxlislari yosh yulduzni olqishlar bilan kuzatib qoʻydi. Endrick endilikda Madridda oʻzining yangi bosqichini boshlash uchun Ispaniyaga yoʻl oladi.
“Zamin”ni Telegramʻda oʻqing!
